Saryaǵash APB-ǵa jergilikti turǵyndardyń biriniń esirtkini zańsyz ótkizýmen aınalysatyny týraly habarlama kelip tústi. Habarlamada kúdiktiniń Saryaǵash aýdany turǵyndarynyń birine marıhýana satqany aıtylǵan. Atalǵan jaıtty polısııa qyzmetkerleri SDTBT-ǵa QR QK-niń 297-baby (Esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý) boıynsha tirkedi.
Jedel-izdestirý is-sharalarynyń nátıjesinde EQQIQB-nyń polıseıleri esirtki satý qylmysyna kúdikti retinde Saryaǵash qalasynyń buryn sotty bolǵan turǵynyn qolǵa túsirdi. Jedel ýákilder ustalǵan adamnyń turǵylyqty mekenjaıyn tintý kezinde úıiniń aýlasynda ornalasqan qoradan qaǵazǵa oralǵan esirtkige uqsas zatty taýyp alyp, tárkiledi. Saraptamaǵa sáıkes, tárkilengen zattyń jalpy salmaǵy 4 gramǵa jýyq marıhýana bolyp shyqty.
Birer kún ótkennen soń dál osyndaı esirtkige baılanysty birneshe jaıt oblysta tirkeldi. Máselen polıseılermen júrgizilgen jedel is-sharalardyń nátıjesinde Báıdibek aýdanynda óz úıinde úsh keliden astam marıhýana saqtaǵan, al Saıram aýdanynda marıhýana satqan er azamat ustaldy. Onyń da turǵylyqty mekenjaıynan 2 gramnan astam marıhýana tárkilendi. Osy atalǵan úsh jaıt boıynsha kúdiktiler qamaýǵa alyndy.
Báıdibektik kúdiktige qatysty QR QK-niń 296-baby boıynsha, al Saıramda ustalǵan kúdiktige qatysty QR QK-niń 297-babymen sotqa deıingi tergeý amaldary júrgizilýde.
Túrkistan oblysynyń polıseıleri esirtkiniń zańsyz aınalymy men taralýyna baılanysty qylmys jasaǵany úshin qylmystyq jaýapkershilik qarastyrylǵanyn eskertedi.
