Qazaqstan • 27 Sáýir, 2021

Aı sońyna deıin halyqtyń 20%-y ekpe alýy tıis – A. Mamın

Búgin Premer-Mınıstr Asqar Mamınniń tóraǵalyǵymen ótken Úkimet otyrysynda eldegi sanıtarlyq-epıdemıologııalyq jaǵdaı qaraldy, dep habarlaıdy Egemen.kz.

Janbolat Kenjeǵul

Qazirgi jaǵdaı men halyqty vaksınalaý barysy týraly densaýlyq saqtaý mınıstri Alekseı Soı, kásipkerlik nysandarynda «Ashyq» qosymshasyn paıdalaný máseleleri týraly «Atameken» UKP tóraǵasy Abylaı Myrzahmetov, óńirlerdegi ahýal týraly Almaty oblysynyń ákimi Amandyq Batalov, Qaraǵandy oblysynyń ákimi Jeńis Qasymbek, Aqmola oblysynyń ákimi Ermek Marjyqpaev baıandady.

Búgingi tańda sanıtarlyq-epıdemıologııalyq jaǵdaı birshama turaqtandy. Vırýstyń reprodýktıvti ındeksi respýblıka boıynsha 1-ge deıin tómendedi. Infeksııalyq tósek oryndar 41%-ǵa, reanımasııalyq tósek oryndar 28%-ǵa toly. Qazirgi ýaqytta COVID-19 taralý qarqyny boıynsha Nur-Sultan jáne Almaty qalalary, Batys Qazaqstan, Atyraý, Aqtóbe, Aqmola, Qaraǵandy, Qyzylorda, Pavlodar jáne Mańǵystaý oblystary «qyzyl aımaqta» ornalasqan. Túrkistan jáne Soltústik Qazaqstan oblystaryn qospaǵanda, qalǵan barlyq óńirler – «sary aımaqta».

26 sáýirden bastap kásipkerlik nysandarynda «Ashyq» qosymshasyn keńinen iske qosý jumystary bastaldy. Endi «Ashyq» qosymshasy aıasynda teatrlar men kınoteatrlardan basqa, dámhanalar, meıramhanalar, saýda-oıyn-saýyq ortalyqtary men sport obektileri, onyń ishinde fıtnes-zaldar ashylýǵa daıyn.

«Búgingi tańdaǵy eń mańyzdy mindet – azamattarymyzdy koronavırýsqa qarsy vaksınalaýmen jappaı qamtý. Sáýir aıynyń qorytyndysy boıynsha vaksınalaýǵa jatatyn halyqtyń 20%-y COVID-19-ǵa qarsy ekpe alýy tıis. Vaksınalaý jospary men óńirlerge vaksınany jetkizý grafıgin saqtaý qajet», dedi A. Mamın.

Premer-Mınıstr azamattardyń maska taǵýy, áleýmettik araqashyqtyqty saqtaýy jáne adamdardyń kóptep jınalýyna jol bermeý boıynsha talaptardyń qatań saqtalýy mańyzdy ekenin atap ótti.

Úkimet basshysy bıznes-ortada «Ashyq» qosymshasyn engizýdi keńeıtýdi tapsyrdy, bul kásipkerlerge engizilgen shekteý sharalary jaǵdaıynda óz qyzmetin jandandyrýǵa múmkindik beredi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz