Álemde COVID-19 aýrýy men ólim-jitimi boıynsha jaǵdaı shıelenise túsýde. Búgingi tańda álemde KVI-diń 148 mln-nan astam jaǵdaıy tirkelgen, táýligine 600 myńnan astam jaǵdaı tirkelýde. 3 mln astam adam qaıtys boldy, ólim-jitim kórsetkishi 2,1% qurady.
221 eldiń álemdik reıtıngine sáıkes, Qazaqstan syrqattanýshylyq kórsetkishi boıynsha 108-orynda, al ólim-jitim kórsetkishi boıynsha 107-orynda tur.
Densaýlyq saqtaý mınıstri habarlaǵandaı, Qazaqstanda 27 sáýirdegi jaǵdaı boıynsha COVID-19 oń nátıjesimen 311 400 naýqas jáne KVI- jaǵdaıymen 52 471 naýqas tirkelgen.
Joǵary epıdemıologııalyq táýekel aımaǵynda 10 óńir bar: Nur-Sultan, Almaty qalalary, Aqmola, Aqtóbe, Atyraý, Batys Qazaqstan, Qaraǵandy, Qyzylorda, Mańǵystaý jáne Pavlodar oblystary.
Búgingi tańda orta epıdemıologııalyq táýekel aımaǵynda 5 óńir bar: Jambyl, Shyǵys Qazaqstan, Almaty, Qostanaı oblystary jáne Shymkent qalasy.
«Jasyl aımaqta» 2 óńir bar: Túrkistan, Soltústik Qazaqstan oblystary.
«Syrqattanýshylyqtyń apta saıynǵy dınamıkasy ósý qarqynynyń naýryz aıynyń sońyndaǵy 46%-dan ótken aptadaǵy 8%-ǵa deıin tómendeýimen sıpattalady. Sońǵy aptada ólim-jitimniń ósýi aldyńǵy aptaǵa qaraǵanda 30%-dan 8%-ǵa deıin tómendedi. О́ńirlerdegi epıdemıologııalyq jaǵdaıdy eskere otyryp, óńirler shekteý sharalaryn túzetýdi jáne qabyldaýdy jalǵastyrýda», dedi A. Soı.
О́ńirdegi árbir medısınalyq uıymynyń deńgeıine deıin tósek-oryn qorynyń júktemesine monıtorıng júrgizýdiń elektrondyq júıesine sáıkes, aǵymdaǵy jylǵy 27 sáýirdegi jaǵdaı boıynsha respýblıka boıynsha ınfeksııalyq tósek-oryndardyń bos bolmaýy 41%, reanımasııalyq tósek-oryndardyń bos bolmaýy 28% quraıdy.
Infeksııalyq tósek-oryndardyń eń kóp bos bolmaýy Qyzylorda oblysynda — 58%, Almaty qalasynda — 57%, Almaty oblysynda — 57%, Nur-Sultan qalasynda — 56% baıqaldy.
«Shamamen 62 myń tósek-oryndyq rezervtik tósek-oryn qory quryldy, onyń 9 700-i tek ınfeksııalyq tósek-oryn. Búgingi tańda rezervtik qor 26 189 tósek-oryndy quraıdy, Aqtóbe, Qostanaı oblystary men Shymkent qalasyn qospaǵanda, barlyq óńirlerdegi ınfeksııalyq stasıonarlar, kópbeıindi aýrýhanalardyń bólimsheleri jumyldyrylǵan. Reanımasııalyq tósek-oryndardyń eń kóp bos bolmaýy Batys Qazaqstan oblysynda — 57%, Almaty qalasynda — 55% jáne Nur-Sultan qalasynda — 54% baıqaldy», dedi vedomstvo basshysy.
Densaýlyq saqtaý mınıstri atap ótkendeı, búgingi tańda QR azamattaryn vaksınalaý eki vaksına — «Spýtnık V» jáne «QazCovid-in» vaksınalary arqyly júzege asyrylady.
«Qazaqstan COVID-19 vaksınasyn álemdik óndirýshilerdiń 10-na kirgenin atap ótkim keledi. 177 eldiń álemdik reıtıngine sáıkes Qazaqstan koronavırýs aımaǵyna qarsy vaksınasııalanǵandardyń sany boıynsha 52-orynda tur. Vaksınany jetkizý kestege sáıkes kezeń-kezeńmen júzege asyrylady, bul sáýir aıynda vaksınalaýǵa jatatyn halyqtyń 20%-na vaksınanyń qoljetimdiligin qamtamasyz etýge múmkindik beredi», dedi A. Soı.
«Atameken» UKP, Sıfrlyq damý, ınnovasııalar jáne aeroǵarysh ónerkásibi mınıstrligimen jáne jergilikti atqarýshy organdarmen birlesip, shekteý sharalary men bıznes jumysy arasyndaǵy teńgerimdi qamtamasyz etý maqsatynda 2021 jylǵy qańtarda Nur-Sultan, Almaty, Qaraǵandy qalalarynda «Ashyq» mobıldi qosymshasyn engizý boıynsha pılotty iske asyrý bastaldy. 26 sáýirden bastap joba búkil el boıynsha qoldanyla bastady.
«Qazirgi tańda «Ashyq» kelesi kásipkerlik nysandarynda júzege asyrylýda: fıtnes-klýbtar, spa-ortalyqtar, basseınder, boýlıng, bılıard jáne kompıýter klýbtary, kınoteatrlar, teatrlar, konsert zaldary, qoǵamdyq tamaqtaný obektileri, oblysaralyq jáne qalalyq júıesiz (týrıstik) tasymaldar. Sondaı-aq, qyzmetkerlerdiń qaýipsizdigin qamtamasyz etý jáne COVID-19 taralýyn azaıtý úshin «Ashyq» mobıldi qosymshasyn ornatýdy kózdeıtin jekelegen qyzmet salalarynyń «Ashyq»-qa jeńildiktersiz, erikti túrde qatysý qarastyrylǵan», dedi A. Soı.
«Ashyq» qatysýshylary úshin oqytý beınerolıkteri, obektilerge QR-kodtardy berý algorıtmi ázirlendi. Jobaǵa josyqsyz qatysýshylardyń yqtımal qosylý táýekelderin eskere otyryp, olardy alyp tastaý krıterııleri anyqtaldy.
«Qabyldanyp jatqan sharalar kásipkerlik jáne (nemese) ózge de qyzmet obektileriniń qyzmetin retteýge, adamdar kóp jınalatyn oryndar boıynsha shekteýge baǵyttalǵan. 27 sáýirdegi jaǵdaı boıynsha jobaǵa qatysýshylardyń jalpy sany 1658 qurady, qosymshany paıdalanýshylar sany 378 myńnan asady», dedi A. Soı.
Barlyq óńirlerde shekteý sharalary epıdemıologııalyq jaǵdaıdy (joǵary, ortasha jáne tómen táýekel aımaqtary) eskere otyryp, saralanǵan túrde qabyldanady, ol úshin «Atameken» UKP-men birlesip qabyldanǵan áleýmettik-ekonomıkalyq obektiler qyzmetiniń krıterııleri qoldanylady. Qazirgi ýaqytta qoldanystaǵy krıterııler «Ashyq» jobasy sheńberinde jumys isteıtin obektiler úshin beıimdelýde.
Almaty oblysynyń ákimi Amandyq Batalov sońǵy aptada koronavırýspen aýyratyndardyń ósý qarqyny 1,2% quraǵanyn, táýligine 264 jaǵdaı tirkelgenin aıtty. Aýrýdyń ósýi aýrýdy juqtyrǵandarmen qarym-qatynasta bolǵan adamdardy tekserý esebinen anyqtalýda. Oblysta barlyǵy 20 490 KVI jaǵdaıy tirkeldi.
«Bir apta ishinde ınfeksııalyq bólimshelerge emdeýge jatqyzylǵandar sanynyń 1,7 esege tómendeý úrdisi baıqalady. Búgingi tańda ınfeksııalyq stasıonardyń júktemesi 57%, reanımasııalyq tósek-oryndardyń júktemesi 13% quraıdy. Bir táýlik ishinde 195 adam aýrýhanaǵa jatqyzylsa, 203 adam emdelip shyqty. Kovıd-ke qarsy kúres boıynsha basqa da qabyldanǵan sharalarmen qatar, algorıtmge sáıkes oblysta halyqty vaksınasııalaý boıynsha aýqymdy jumystar júrgizilýde», dedi A. Batalov.
О́ńirde 239 egý pýnkti, onyń ishinde 80 jyljymaly pýnkt ashyldy (63 mobıldi brıgada, 17 jyljymaly medısınalyq keshen). Vaksınalaýdyń kúndelikti jáne aılyq kesteleri jasaldy. Jyljymaly vaksınalaý pýnktteri shalǵaı eldi mekenderde, saýda úılerinde, qoǵamdyq oryndarda jumys isteıdi. Eńbek ujymdaryn vaksınalaý úshin mobıldi brıgadalar uıymdastyryldy.
Búgingi kúni 147 myń doza vaksına alyndy, 129,3 myń adam egildi. Aı sońyna deıin vaksınanyń qosymsha 70 myń dozasy jetkiziledi dep kútilýde. Barlyǵy 1,1 mln adamdy vaksınalaýmen qamtý josparlanyp otyr.
О́z kezeginde Qaraǵandy oblysynyń ákimi Jeńis Qasymbek pandemııa bastalǵannan beri óńirde 22 486 jaǵdaı tirkelgenin jetkizdi.
Qazirgi ýaqytta Qaraǵandy oblysy epıdemıologııalyq jaǵdaıdyń damýy boıynsha qyzyl aımaqqa kiredi. Reprodýktıvti sany 1,071 quraıdy. Búgingi tańda stasıonarlarda 1 498 naýqas em alýda. Aýrýhanalardaǵy tósek-oryndar júktemesi – 34,7%.
«Vırýs juqtyrǵandardyń basym kópshiligi oblys ortalyǵynda tirkelgendikten, qýatyn 1 654 orynǵa deıin ulǵaıta otyryp, buryn konservasııalanǵan gospıtaldardy iske qostyq. Buǵan qosa, 500 tósek-oryn rezervte tur», dedi J. Qasymbek.
Oblysta koronavırýsqa qarsy vaksınalaý naýqany jalǵasýda. Arnaıy tońazytqysh jabdyqtarymen jaraqtalǵan 115 egý kabıneti ashyldy, olardyń qabyldaý múmkindigi kúnine 8 050 adamdy quraıdy.
«Vaksınany óńirlerge jetkizý logıstıkasy pysyqtaldy. Vaksınany qysqa qashyqtyqqa tasymaldaý úshin 115 termokonteıner satyp alyndy, alys qalalar men aýdandarǵa vaksına sýyq tizbekti saqtaı otyryp, refrıjeratorlarda jetkiziledi. Qazir oblys vaksınalaý boıynsha jobalyq qýatyna shyqty. Búgingi tańda vaksınanyń birinshi komponentin 94 630 adam, ekinshi komponentin 10 873 adam aldy. Sáýir aıynda barlyǵy 171 800 doza vaksına jetkizildi», dedi Qaraǵandy oblysynyń ákimi.
Turǵyndarǵa E-gov jáne Damumed jeke kabıneti arqyly vaksınalaýǵa jazylý qoljetimdi. Turǵyndar úshin barynsha yńǵaıly vaksınalaý naýqanyn ótkizý qajettiligin eskere otyryp, iri saýda ortalyqtarynda egý kabınetteri ashyldy. Zeınetkerlerdi vaksınalaýdy kóshpeli mobıldi brıgadalar úıge baryp júrgizedi.
Sonymen qatar oblystyń ónerkásip kásiporyndarynyń qyzmetkerlerin qamtý boıynsha jospar quryldy. Kásiporyndardyń medısınalyq pýnktterin qoldana otyryp, kóshpeli brıgadalar vaksınalaý júrgizedi.
Aqmola oblysynyń ákimi Ermek Marjyqpaev pandemııa bastalǵannan beri óńirde KVI aýrýynyń tirkelgen jaǵdaıy 17 867 adamdy quraǵanyn habarlady. 16404 adam nemese 92% emdelip shyqty.
«Búgingi kúni kereýet qory 1 643 orynǵa deıin ulǵaıtyldy. Barlyq oryndar ottegimen qamtamasyz etildi, reanımasııalyq oryndardyń jabdyqtalýy 100% quraıdy. Halyqty koronavırýs ınfeksııasynan vaksınalaý jumysy jalǵasýda. 87 egý pýnkti, 11 jyljymaly medısınalyq keshen jumys isteıdi», dedi E. Marjyqpaev.
Halyq jappaı jınalatyn iri saýda-oıyn-saýyq ortalyqtarynda, ortalyq meshitte, halyqqa qyzmet kórsetý ortalyqtarynda qosymsha egý pýnktteri ashyldy.
«Spýtnık V» vaksınasynyń birinshi komponenti 24,5 myń adamǵa, ekinshisi komponenti 6 690 adamǵa egildi. Vaksınany saqtaý úshin medısına uıymdarynda 53 muzdatqysh kamerasy, 340 termokonteıner, 33 sómke-muzdatqysh, 1 690 hladoelement bar.
О́ńirde áli de bolsa qatań shekteý sharalary qoldanylady. Sońǵy aptada monıtorıng toptarymen 219 tekserý reıdi ótkizildi, monıtorıngpen 1 017 obekt qamtyldy, karantın sharalaryn buzýdyń 19 faktisi anyqtaldy, 17 ákimshilik aıyppul salyndy.
«Ashyq» qosymshasyn engizý jumysy júrgizilýde. «Ashyq» jobasynyń áleýetti qatysýshylarynan 37 ótinim kelip tústi, 27 QR-kod berildi. Dárilik zattardyń 2 aılyq qory quryldy. Densaýlyq saqtaý uıymdary jeke qorǵaný zattarymen tolyq kólemde qamtamasyz etildi. Suranysqa ıe bolatyn dárilik zattardy qosymsha satyp alý úshin turaqtandyrý qorynda 500 mln teńge qarastyryldy.
