«Bul joba koronavırýstyń taralýyn boldyrmaýǵa kómektesedi. Sebebi ol kelýshiler men qyzmetkerlerdi qaýipti indetten qorǵaıdy. Qaýipsiz jobanyń arqasynda kınoteatrlar, fıtnes-klýbtar, basseınder, teatrlar sııaqty kóptegen nysandar jumysyn qaıta bastady. Ashyq júıesi boıynsha jumys isteıtin bıznes nysandary barlyq kúnderi 00:00-ge deıin jumys isteı alady. Al ózgelerine — 22:00-ge deıin ári demalys kúnderi jumys isteýine tyıym salynǵan. Eger olar óz qyzmetkerleri men kelýshileriniń qaýipsizdigi týraly oılamasa, olardyń jumys ýaqytyn 20:00-ge deıin qysqartýǵa májbúr bolamyz», dedi elordanyń bas memlekettik sanıtarlyq dárigeri Sarhat Beısenova.
Úkimet otyrysynda Ashyq jobasy boıynsha qyzmetin qaıta bastaǵan «Astana Balet» jáne «Astana Opera» teatrlary jobanyń qaýipsiz jáne tıimdi jumysynyń úlgili mysaldary bolyp sanalatyny aıtyldy. Bul teatrlardyń jumys tájirıbesin óńirlerge keńeıtý qajet.
Esterińizge sala keteıik, qoǵamdyq mekemege kirer aldynda paıdalanýshy arnaıy QR-kodty skanerleıdi jáne ony kireberistegi ákimshige usynady. Kod kelýshiniń mártebesin anyqtaıdy. Ár túske sáıkes mártebe kelesideı maǵyna beredi:
«Qyzyl» mártebe — PTR-test tapsyryp, koronavırýs anyqtalǵan adamǵa beriledi. Mundaı mártebe ıeleri úıde oqshaýlaný rejımin qatań saqtaýy tıis.
«Sary» – baılanysta bolǵan adamdarǵa beriletin mártebe. Olarǵa azyq-túlik alýǵa nemese úıdiń janyndaǵy dárihanaǵa barýǵa ruqsat etilgenmen, basqa qoǵamdyq oryndarǵa barýyna tyıym salynady.
«Kók» — aýrý juqtyrǵan adamdarmen baılanysta bolǵan adamdar esebinde joq, PTR-test (mysaly áýejaıda) talap etiletin jerlerden basqa kez kelgen orynda erkin qozǵalý degendi bildiredi.
«Jasyl» – júrip-turýynda shekteý joǵyn bildiredi, mundaı adam bazada COVID-19 indetine PTR-testileýi teris nátıje kórsetken paıdalanýshy bolyp sanalady.
