О́ńirde mamyr aıynyń 1-inen bastap turǵyndardyń erkin júrip-turýy qatań shektelip, blok-beketter ornatylatyn boldy.
Indet bastalǵaly beri oblysta koronavırýstyq ınfeksııa 19 030 ret tirkelgen. Al 2021 jyly qańtar aıynda – 1837, aqpan aıynda – 1950, naýryz aıynda – 2138, sáýir aıynda – 3884 jaǵdaı esepke alynǵan eken. Kórip otyrǵanymyzdaı, vırýs juqtyrǵandar sany aıdan aıǵa kóbeıip, sáýir aıynda tipti órship ketken.
– 1-28 sáýir aralyǵynda 2144 adam tumaý belgilerimen dárigerge qaralyp, olardan koronavırýs anyqtaldy. Bul naýqastarmen jaqyn qarym-qatynasta bolǵan adamdardy tekserý kezinde taǵy 1098 adamnyń vırýs juqtyrǵany belgili boldy, – deıdi Batys Qazaqstan oblystyq sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev.
26 sáýir kúngi nátıjeler boıynsha Bórli, Báıterek, Qaztalov, Terekti, Jańaqala, Shyńǵyrlaý aýdandary jáne Oral qalasy eń qaýipti qyzyl aımaqta qalyp otyr.
Vırýs juqtyrǵandardyń eń kóbi, ıaǵnı 35,2%-y – jumys isteıtin adamdar eken. Biraq basqa toptar da az emes. Sońǵy bir aı ishinde 975 zeınetker, 908 jumyssyz, 293 oqýshy, 75 medısına qyzmetkeri, 89 muǵalim, balabaqshaǵa barmaıtyn 69 bala, balabaqshaǵa baratyn 28 bala, 18 tárbıeshi, 53 stýdent aýyrǵan.
Oqý jyly bastalǵaly COVID-19 mektepte dástúrli formatta oqıtyn 480 oqýshyda, qashyqtan oqıtyn 442 oqýshyda anyqtalǵan. Munyń 293-i 4 toqsanda, ıaǵnı 1 sáýirden bastap juqtyrǵan. Búginde qala jáne aýdan sanıtar dárigerleriniń qaýlysymen 40 mekteptegi 69 synypta oflaın oqý toqtatylsa, 6 mektep tolyǵymen qashyqtan oqýǵa kóshti. 7 balabaqshada 7 top, JOO-da 1 top, 2 kolledjde 2 top karantınge jabylǵan.
О́ńirde sanıtarlyq-dezınfeksııalyq rejım talaptaryn buzý faktilerin qadaǵalaıtyn monıtorıngtik toptar 1 sáýirden beri 634 márte reıd júrgizip, 3422 nysandy teksergen eken. Nátıjesinde 34 nysanda talap buzýshylyqtar anyqtalǵan. Olarǵa 130 hattama toltyrylyp, 8 284 280 teńgege aıyppul salyndy.
Batys Qazaqstan oblystyq densaýlyq saqtaý basqarmasy basshysynyń mindetin atqarýshy Arman Qalıbekov 2021 jyldyń basynan beri COVID-19-dan óńirde 107 adam qaıtys bolǵanyn aıtyp otyr. Onyń ishinde qańtarda – 28, aqpanda – 15, naýryzda – 30, sáýirde – 32 adam dúnıe salǵan. Qaıtys bolǵandardyń 58-i – áıel adamdar, 49-y – er azamattar eken. Naýqastardyń basym kópshiligi, ıaǵnı 94-i – qalada qaıtys bolǵan.
Qazirgi tańda 19 naýqas karantındik stasıonarda, 603 adam ınfeksııalyq stasıonarda em alyp jatyr eken. 40 naýqas reanımasııa bóliminde.
Oblysta koronavırýsqa qarsy ekpe júrgizý isi 1 sáýirde bastalǵan. Arman Qalıbekovtiń aıtýynsha, osy ýaqytqa deıin oblysqa vaksınanyń 62 700 dozasy kelip túsken. Qazirdiń ózinde 32 937 adam ekpeniń alǵashqy dozasyn, 8 408 adam ekinshi dozasyn alyp úlgergen.
О́tken sársenbiden bastap Oral qalasynda mobıldi ekpe beketteri turǵyndardy jappaı vaksınalaý isine kirisken. Iаǵnı jyljymaly medısınalyq keshender oblys ortalyǵynyń iri-iri saýda ortalyqtary janynda turyp, kez kelgen adamǵa óz qalaýy boıynsha ekpe salady. Ol úshin kelýshiniń jeke kýáligi bolsa jetkilikti. Ekpe alǵan adam 30 mınýt dáriger baqylaýynda bolady. Ol otandyq nemese reseılik vaksına alatynyn ózi tańdaıdy.
Joǵaryda aıtqanymyzdaı, 1 mamyrdan bastap Oral qalasy, sondaı-aq Aqjaıyq, Báıterek, Bórli, Qaztalov, Terekti jáne Shyńǵyrlaý aýdandaryna kireberiske, barlyǵy 7 orynǵa blok-beket ornatylady. Bul beketterden halyqtyń tynys-tirshiligin qamtamasyz etetin uıym-mekeme qyzmetkerleri, medısınalyq uıymdarda em alýshylar, júk tasymaldaýshylar jáne tranzıttik jolaýshylar, vahta jumysshylary jáne olardy tasymaldaıtyn kólikter kedergisiz óte alady. Sondaı-aq kóktemgi dala jumystarymen shuǵyldanýshylar da bul sanatqa kiredi.
Batys Qazaqstan oblystyq bas memlekettik sanıtar dárigeriniń orynbasary Nurlybek Mustaevtyń aıtýynsha, aýrý kórsetkishi tómendep, jaǵdaı túzeler bolsa, bir apta ishinde beketterdi alyp tastaý máselesi qaıta qaralady.
