«Salynǵan tyıymdarǵa qaramastan jurt úı karantınine mán bermeıdi. Bul olardyń «Ashyq» jobasyna qatysýshylardyń obektilerge barýymen rastalady. Joba arqyly sáýir aıynda úı karantınin buzǵan 700-den astam fakt anyqtaldy, onyń ishinde 300-ge jýyǵy naýqas jáne 400-den astamy baılanysta bolǵan adam bar.
Qazirgi ýaqytta Nur-Sultanda «Ashyq» jobasyna 222 kásipkerlik sýbekti qatysady. «Ashyq» jobasyn engizýdiń negizgi maqsaty – juqtyrǵan nemese baılanysta bolǵan adamdardyń qoǵamdyq oryndarǵa barýyna jol bermeý, sol sııaqty qala qaı aımaqta bolsa da bıznestiń toqtap qalmaýyna múmkindik jasaý», dedi bas sanıtarlyq dáriger.
Sondaı-aq ol kelýshi QR-kodyn skanerlep, ákimshige usynatynyn, osy arqyly onyń mártebesi anyqtalatynyn eske saldy.
«Qyzyl» mártebe — PTR-test tapsyryp, koronavırýs anyqtalǵan adamǵa beriledi. Mundaı mártebe ıeleri úıde oqshaýlaný rejımin qatań saqtaýy tıis. Bul mártebe PTR synamasy oń nátıje kórsetkennen keıin 14 kúnnen soń alynyp tastalady.
«Sary» – baılanysta bolǵan adamdarǵa beriletin mártebe. Olarǵa azyq-túlik alýǵa nemese úıdiń janyndaǵy dárihanaǵa barýǵa ruqsat etilgenmen, basqa qoǵamdyq oryndarǵa barýyna tyıym salynady. Bul mártebe PTR synamasy oń nátıje kórsetken adammen baılanysta bolǵanyna 14 kún ótken soń «kók» túske aýysady.
«Kók» — aýrý juqtyrǵan adamdarmen baılanysta bolǵandar esebinde joq, PTR-test (mysaly áýejaıda) talap etiletin jerlerden basqa kez kelgen orynda erkin qozǵalý degendi bildiredi.
«Jasyl» – júrip-turýynda shekteý joǵyn bildiredi, mundaı adam bazada COVID-19 indetine PTR-testileýi teris nátıje kórsetken paıdalanýshy bolyp sanalady. Bul PTR synamasy teris nátıje kórsetken kúnnen bastap úsh kún ótken soń alynyp, «kók» túske aýystyrylady.
«Bul qosymshany paıdalanatyn mekemeler sanıtarlyq normalardan bosatylmaıdy. Biraq juqtyrý qaýpin barynsha azaıtady. Eger kásipkerlik nysandar kelýshilerdi úsh kún boıy tirkemegen bolsa, jumys algorıtmin buzǵan bolyp esepteledi. Monıtorıng toptarynyń nátıjesinde bul nysannyń jumysyna tek eki aptadan keıin ǵana ruqsat beriledi. Al eger bul áreket taǵy da qaıtalansa, eki aı jumys isteýine tyıym salynady», dedi Sarhat Beısenova.
