Mazmundy is-sharaǵa elimizdegi Sambo federasııasynyń tóraǵasy, Qazaqstanǵa eńbek sińirgen jattyqtyrýshy Asylbek Kákenov jáne bas shahardaǵy Q.Muńaıtpasuly atyndaǵy olımpıada rezerviniń respýblıkalyq mamandandyrylǵan mektep-ınternat kolledji dırektorynyń tárbıe isi jónindegi orynbasary Ardaq Qalıeva jáne Ulttyq mýzeıdiń Qazaqstan tarıhy bóliminiń aǵa ǵylymı qyzmetkeri Syrym Hasenov jáne taǵy basqa sportshylar qatysyp, orasan kúsh ıesiniń ómiri men óneri jaıynda keńirek sóz qozǵady.
Kózi tirisinde aty ańyzǵa aınalǵan tuǵyrly tulǵa teńdessiz ónerimen 54 memlekette kúreske túsip, 48 medal oljalaǵan. Mundaı myqty balýan ótken ǵasyrdyń basynda túrki halyqtarynyń ishinde qazaqtan ǵana shyqqan. Ásirese alyp azamat 1910 jyly alǵash ret Ońtústik Amerıka qurlyǵyna tabany tıip, Argentınanyń astanasy Býenos-Aıres qalasynda ótken erkin kúreste Amerıka chempıony ataǵyn jeńip alǵany ǵajap.
Kezdesý barysynda Qazaqstan Respýblıkasynyń Aýyr atletıka federasııasynan halyqaralyq sport sheberi, jastar men eresekter arasyndaǵy el chempıony Altynshash Orazbek pen aýyr atletıkadan Qazaqstan chempıony, sport sheberine úmitker Edige Emberdi jınalǵandarǵa ózderi eńbektenip júrgen sport salasy týraly áńgimelep berdi. Sondaı-aq Q.Muńaıtpasov atyndaǵy olımpıada rezerviniń respýblıkalyq mamandandyrylǵan mektep-ınternat-kolledjiniń jetkinshekteri karate-do, dzıýdo, grek-rım, erkin kúres sııaqty sport túrlerinen óz ónerlerin kórsetse, respýblıkalyq týrnırlerdiń chempıony, sport sheberine úmitker Dına Kýznesova men halyqaralyq týrnırlerdiń jeńimpazy Nurasyl Jánibek Qajymuqan atasyna arnaǵan óleńderin oqydy.
Taǵylymdy sabaq sońynda keshke qatysýshylar Ulttyq mýzeıdiń qorynda saqtalǵan ataqty balýannyń qujattary men fotosýretteri, jeke zattarynan daıyndalǵan kórmeni tamashalady.
