«Erteńnen bastap Nursultan Nazarbaev halyqaralyq áýejaıynda «Ashyq» qosymshasy iske qosylady. Barlyq jolaýshyǵa qosymshany aldyn ala júktep alyp, onda kórsetilgen mártebesin tekserý qajet ekenin eskertemiz.
Termınal ǵımaratyna «sary» jáne «qyzyl» mártebesi bar adamdar jiberilmeıdi. Ol jaǵdaıda qarajatty qaıtarý máselesi boıynsha saýaldardy avıakompanııaǵa jibergen jón. Aqparat Densaýlyq saqtaý mınıstrliginiń jalpy bazasynan alynady jáne jolaýshynyń qazirgi ýaqyttaǵy mártebesi anyqtalady», dep túsindirdi áýejaı baspasóz qyzmetiniń ókili.
Smartfony joq jolaýshylar JSN arqyly áýejaı qyzmetkeri planshetin qoldanyp mártebesin teksere alady. Sheteldik jolaýshylar mártebesin tólqujat nómirin engizý arqyly tekseredi.
Sondaı-aq áýejaı qyzmetkerleri «tańerteńgi reıster kezinde» osy máselege baılanysty uzyn-sonar kezek týyndaǵanyn aıtty.
«Mundaı jaǵdaı qaıtalanbas úshin qosymshany uıaly telefonyńyzǵa aldyn ala júktep alýdy usynamyz», dedi baspasóz qyzmeti ókili.
