Áleýmettik jeli qoldanýshylarynyń aıtýynsha, medısına qyzmetkerleriniń zańsyz áreketteri Almatydaǵy № 4 qalalyq emhanada anyqtalǵan. Onda medısına uıymy qyzmetkerleri jalǵan vaksınasııa tólqujattaryn satqany aıtylǵan. Vaksına dozalary 15 myń teńge turady degen boljam bar.
«Medısına qyzmetkerleri, sonyń ishinde bas dárigerlerdiń mundaı áreketi jappaı vaksınasııa prosesin báseńdetedi jáne qunsyzdandyrady. Sebebi bul jaǵdaıda dári-dármekterdi, jeke qorǵanys quraldaryn jáne medısınalyq maqsattaǵy buıymdardy satyp alýdy josparlaý bóliginde statıstıka ózgeredi. Bul strategııanyń kemshilikterine ákeledi. Ol qazirdiń ózinde saıası másele.
Vaksınalardy satyp alýǵa qarjy bólinedi. Dál sol jaǵdaıda preparat zańsyz joıylady, ıaǵnı salyq tóleýshilerdiń aqshasy jelge ushady. Bul birinshi jaǵdaı emes ekenin eskere otyryp, mundaı jaǵdaılardyń aýqymy men aǵymyn boljaýǵa bolady», dep jazdy «Medısına ı ne tolko» tobyndaǵy jazba avtory.
Almaty qalalyq Qoǵamdyq densaýlyq basqarmasy medısına qyzmetkerleriniń zańsyz áreketin quqyq qorǵaý organdary tekserip jatqanyn habarlady.
«Medısına qyzmetkerleriniń jalǵan vaksınalaý deregi boıynsha materıaldar quqyq qorǵaý organdaryna berildi», dedi QDSB baspasóz qyzmeti ókilderi.
Buǵan deıin Almatyda deldal 15 myń teńgege birden birneshe emhananyń atynan vaksınasııadan ótkeni týraly elektron qujat usynǵany habarlanǵan bolatyn.
