Otyrys barysynda Qarýly Kúshterdi, basqa da áskerler men áskerı qurylymdardy 2030 jylǵa deıin qurý jáne damytý tujyrymdamasynyń jobasy qaraldy, sondaı-aq shekaralyq qaýipsizdikti qamtamasyz etý máseleleri talqylandy.
Otyrysty ashqan Qaýipsizdik Keńesiniń tóraǵasy el damýynyń kúrdeli syrtqy jaǵdaılary, eń aldymen, koronavırýs ınfeksııasynyń jahandyq pandemııasynyń áleýmettik-ekonomıkalyq saldarymen baılanysty ekenin atap ótti. Osyǵan baılanysty, vaksınasııa jumystarynyń mańyzy, sondaı-aq Úkimettiń halyqtyń áleýmettik máselelerin sheshý jáne ekonomıkalyq ósý qarqynyn saqtaý qajettiligi atap ótildi. Nursultan Nazarbaev qazirgi jaǵdaıdaǵy áskerı qurylym men Qarýly Kúshterdiń konfıgýrasııasynda jańa tásilderdi ázirleý qajettiligin atap ótti.
– Biz barlyq kórshimizben berik dostyq qarym-qatynas jáne jetekshi derjavalarmen berik áriptestik ornattyq. Sonymen qatar myqty ásker – el qaýipsizdiginiń mańyzdy kepili, – dedi Qaýipsizdik Keńesiniń tóraǵasy.
Elbasy búginde asımmetrııalyq jáne gıbrıdti qaterlerdi toıtarýǵa daıyndyq, jańa tehnologııalardy engizý jáne áskerı prosesterdi basqarýdy avtomattandyrý mańyzdy mánge ıe bolyp otyrǵanyn málimdedi.
– Bizdiń Qarýly Kúshterimiz egemendik pen aýmaqtyq tutastyqty, ulttyq múddelerdi qorǵaýǵa qabiletti bolýy kerek. Osynyń bári taıaýdaǵy onjyldyqta áskerdi damytýdy josparlaý kezinde eskerilýi tıis, – dep tapsyrdy Nursultan Nazarbaev.
Qaýipsizdik Keńesiniń tóraǵasy shekara qaýipsizdigin qamtamasyz etý mindetin sheshý Shekara qyzmetiniń jumysyn jáne shekarany qorǵaý ádisterin jetildirýdi ǵana emes, sondaı-aq ekonomıkalyq, aqparattyq, qoǵamdyq jáne áskerı qaýipsizdik baǵyttaryna baılanysty júıeli sharalardy talap etetinin atap ótti.
– Shekarany qaýip-qaterdiń barlyq túrlerinen senimdi túrde qorǵaýdy qamtamasyz etý qajet. Shekara qyzmeti men Qarýly Kúshterdiń qurylymy úndestirilip, biryńǵaı standarttar boıynsha júrgizilýi tıis. Sonymen qatar biz shekara qaýipsizdigi máselesin keshendi, júıeli túrde qaraýymyz kerek, – dedi Nursultan Nazarbaev.
Sondaı-aq eldiń aýmaqtyq-keńistik damýynyń basymdyqtary shekaralyq qaýipsizdikti qamtamasyz etý jónindegi mindettermen sáıkes kelýi tıis. Otyrys barysynda Qorǵanys mınıstri N.Ermekbaev pen UQK Shekara qyzmetiniń dırektory D.Dilmanovtyń baıandamalary tyńdaldy.
