Aıagóz qalasynda Úkimet basshysyna «Taldyqorǵan – О́skemen» (768 km), «Qalbataý – Maıqapshaǵaı» (415 km) jáne «Úsharal – Dostyq» (180 km) avtomobıl joldaryn rekonstrýksııalaý barysy týraly baıandaldy. Premer-Mınıstr Shyǵys Qazaqstan jáne Almaty oblystarynyń joldaryndaǵy qurylys jumystarynyń qarqynyn arttyrýdy tapsyrdy.
Bul rette Úkimet basshysy qurylyp jatqan kólik ınfraqurylymynyń sapasyn qamtamasyz etýdiń jáne ony ýaqytyly paıdalanýǵa berýdiń mańyzyn atap ótti. Sonymen qatar Aıagóz aýdanynda A. Mamın «KAZ Minerals Aktogay» JShS keńeıtý jobasymen tanysty.
Bıyl sýlfıdti kendi óńdeıtin Aqtoǵaı II baıytý fabrıkasynyń qurylysyn aıaqtaý josparlanǵan. Investısııa kólemi 514,6 mlrd teńgeni ($1,2 mlrd) quraıdy. 1 myń jańa jumys orny qurylady. Jobany iske asyrý 2022-2027 jyldary kásiporyn óndiretin mys kólemin jylyna 125 myń tonnadan 200 myń tonnaǵa deıin ulǵaıtýǵa jáne kenishti álemdegi eń iri ken oryndarynyń qataryna shyǵarýǵa múmkindik beredi.
Aqtoǵaı ken ornynda sondaı-aq oksıdti kenderdi qaıta óńdeý kesheni jumys isteıdi, onda 2024 jylǵa deıin jyl saıyn 20 myń tonna katodty mys óndirýdi qamtamasyz etý josparlanyp otyr. Glýbokoe aýdanynyń Solnechnoe aýylynda Úkimet basshysy «Maıly daqyldardyń tájirıbelik sharýashylyǵy» JShS (MDTSh) taýarly-sút fermasyn, egis alańdaryn jáne aýyl sharýashylyǵy tehnıkasyn qarap shyqty. 2020 jyly kásiporyn 13 myń tonna sút jáne 300 tonna sıyr etin óndirdi.
О́ndiristi jańǵyrtý aıasynda 2022-2025 jyldary jalpy sút saýýdy táýligine 40 tonnadan 100 tonnaǵa deıin arttyrý josparlanyp otyr. MDTSh QR-daǵy aldyńǵy qatarly tuqym ósirý sharýashylyqtarynyń biri. О́tken jyly aýyl sharýashylyǵy daqyldarynyń tuqymdaryn satý boıynsha JShS 1-orynǵa ıe boldy (10 myń tonna tuqym).
О́tken 5 jylda barlyq ósiriletin aýyl sharýashylyǵy daqyldary boıynsha ortasha ónimdilik gektaryna 4,3 tonnany qurady. Kásiporyn Solnechnoe aýylynda jalpy aýdany 3,7 myń sh.m. az qabatty turǵyn úıler keshenin salý arqyly «Aýyl – El besigi» jobasyn iske asyrýǵa belsendi qatysady.
Semeı qalasynda Premer-Mınıstr «Qazaq astyq group» JShS maı ekstraksııalyq zaýytynyń kúnbaǵys tuqymyn qaıta óńdeý jelisiniń jumysyn iske qosty. Investısııanyń jalpy somasy – 13 mlrd teńge. Kásiporynnyń qýaty – táýligine 1000 tonna kúnbaǵys tuqymyn nemese 800 tonna raps/zyǵyr tuqymyn qaıta óńdeý. Kásiporynda 300-den astam turaqty jumys orny ashyldy.
Zaýyt Qazaqstannyń ósimdik maıyna degen ishki qajettiligin qamtamasyz etedi, onyń ónimderi syrtqy naryqqa da eksporttalady. A.Mamın Qazaqstandaǵy radıofarmpreparattar óndirýden jáne olardy onkologııalyq aýrýlardy erte dıagnostıkalaýda qoldanýdan bastap, pasıentterge radıonýklıdtik terapııa júrgizýge deıingi tolyq sıkldi ıadrolyq medısınanyń jalǵyz medısınalyq mekemesi – «Semeı qalalyq ıadrolyq medısına jáne onkologııa ortalyǵyna» bardy. Úkimet basshysy sondaı-aq Qazaqstanda alǵash ret balalar men eresekterdi ońaltý tehnologııasy – «h/p/cosmos locomotion» qoldanylǵan, bıyl qalada ashylǵan «iv plus klınıkasynyń» qyzmetimen tanysty.
Munda aǵzanyń fızıologııalyq jáne motorlyq fýnksııalaryn qadaǵalaýdyń elektrondyq júıelerin paıdalanatyn sıfrlyq platformadaǵy elimizdegi alǵashqy medısınalyq ońaltý ortalyǵy ashyldy.
Bıylǵy jyldyń 4 aıynyń qorytyndysy boıynsha Shyǵys Qazaqstan oblysynda ónerkásip óndirisiniń kólemi 2020 jyldyń sáıkes kezeńimen salystyrǵanda 6,7%-ǵa – 860,8 mlrd teńgege deıin ósti.
Aýyl sharýashylyǵynyń jalpy óniminiń kólemi 93,8 mlrd teńgeni (+2,1%), qurylys jumystarynyń kólemi – 51,6 mlrd teńgeni (+5,6%) qurady. Negizgi kapıtalǵa salynǵan ınvestısııalar 177,6 mlrd teńgege jetti (+6,8%).
Jumys saparyna Shyǵys Qazaqstan oblysynyń ákimi Danıal Ahmetov, ındýstrııa jáne ınfraqurylymdyq damý mınıstri Beıbit Atamqulov, aýyl sharýashylyǵy mınıstri Saparhan Omarov, qarjy mınıstri Erulan Jamaýbaev, densaýlyq saqtaý mınıstri Alekseı Soı, tótenshe jaǵdaılar mınıstri Iýrıı Ilın qatysty.
