Jambyl oblysynyń ákimi Berdibek Saparbaevtyń bastamasymen oblysta «Jomart túlek» jobasy qolǵa alynǵan bolatyn. Ondaǵy maqsat – týǵan jerden túlep ushqan, túrli salada tabysty eńbek etip júrgen túlekterdiń ómir jolyn jas urpaqqa úlgi etý, sonymen qatar, osy azamattardyń atsalysýymen týǵan jerdiń áleýmettik máselelerine qatysty sharalardy qabyldaý jáne mańyzdy jobalardy iske asyrý edi.
Týǵan jerdiń damýyna úles qosyp júrgen tanymal azamattardyń basyn qosqan «Jomart túlek-2021» forýmy Qarataý qalasynda da uıymdastyryldy. Sharaǵa kindik qany Talas topyraǵyna tamyp keıin elimizge belgili bolǵan tulǵalarmen qatar, qaıyrymdy isterge uıytqy bolyp júrgen kásipkerler qatysty.
Forýmda túlekterdiń aımaqtyń damýyna qosqan úlesterin erekshe atap ótken aýdan ákimi Qanatbek Mádibek olardyń eńbekterine tabys tiledi.
Shara barysynda sóz alǵan jazýshy, jýrnalıst, Jambyl oblysynyń memlekettik arhıviniń dırektory Kósemáli Sáttibaıuly týǵan jerin kórkeıtýge qoldaý tanytyp júrgen azamattarǵa rızashylyǵyn jetkizdi.
– Ár azamat óz qabiletine qaraı kómek tanytady. Máselen, shyǵarmashylyq adamdary eldiń esinde qalatyn, ólmes týyndylar syılaıdy, sóz qaldyrady. Kásipkerler demeýshilik kómekterin kórsetedi. Keıinge úlgi bolatyn osyndaı azamattar sany artsa, elimiz kórkeıedi, – deı kele «biter istiń basyna, jaqsy keler qasyna» demekshi aýdan basshylyǵyna jańadan kelgen Qanatbek Qaıshybekulyna Qarataý qalasynyń qaq ortasynda qashannan beri qaraýsyz turǵan ǵımarattardyń máselesi sheshilip, halyq kádesine jaratýdy qolǵa alsańyz degen tilegin de jetkizgen bolatyn. Osy oraıda aýdannyń Qurmetti azamaty Dosan Rymtaev kóterilgen bastamany qoldaıtyndyǵyn jetkizdi. Izinshe ózi basqaratyn seriktestik menshigindegi joǵaryda sóz bolǵan ǵımarattyń biri burynǵy «Qarataý» qonaq úıin halyqtyń ıgiligine tartý etti.
– Kósemáli aǵamyz oryndy másele kóterip otyr eken, aýdan úshin aıanyp qalar jaıym joq. Jergilikti ákimdikke atalǵan ǵımaratty tegin tartý etemin. Tipti, jóndeý jumystaryna da atsalysamyn, – dedi.
Rasynda Qarataý qalasynyń qaq ortasyndaǵy ǵımarat bir kezderi záýlim qonaq úı bolǵan. Keıin toqsanynshy jyldardaǵy toqyraýda jekeniń qolyna ótip, qaraýsyz qaldy.
