Fılarmonııanyń tól tarıhy sonaý 1938 jyldan bastaý alady. Áýelgi jyldary bul qarashańyraqta Qalı Baıjanov, Júsipbek Elebekov, Maǵaýııa Hamzın, Nuǵyman Ábishev, Zábıra Jubatova, Rahııa Qoıshybaeva syndy qazaq óneriniń bastaýynda turǵan halyq ónerpazdary qyzmet etken. Al zamanmen birge túrlenip, ǵasyrmen birge túlegen búgingi ujym keshegi aǵa býynnyń shyǵarmashylyq bıigin alasartpaı, asqaqtatyp kele jatyr. 80 jyldan astam tarıhy bar konserttik birlestik ár jyldary qanatyn keńge jaıyp otyrdy. Máselen, 1988 jyly birlestik janynan qazaq halyq aspaptary orkestri shańyraq kóterdi. Eki jyldan soń dáýlesker dombyrashy, shertpe kúıdiń sheberi atanǵan Táttimbettiń esimi berildi. Orkestrdiń eń alǵashqy dırıjeri bolǵan Qazaqstannyń eńbek sińirgen qaıratkeri Dúısen Úkibaıdyń, odan keıingi qanattas inisindeı bolǵan Shamǵon Qajyǵalıevterdiń qazaq ónerin tórtkúl dúnıege tanystyrýdaǵy eńbegi eresen. «Úlken aǵalarymyzdan azdap estigenimiz bar. Ol kezde arbamen aýyl-aýyldy aralap, konsert bergen. Soǵys kezinde arnaıy brıgadalary bolǵan. Úlken ujym atanýy 1950-jyldardan bastaldy, ol tusta birlestik jetekshisi Qalı Baıjanov bolatyn. Naǵyz eńbektiń adamy. Keshegi Jarylǵapberdiden án úırengen, dástúrli Arqa ánderiniń ǵalamat oryndaýshysy bolǵan. Sol ujym búginde bıik deńgeıden tómendemeı, tynymsyz eńbektiń nátıjesinde tyńdarmandardyń qoshemetine bólenip keledi», deıdi Q.Baıjanov atyndaǵy konserttik birlestiktiń bas dırektory Talǵat Ydyrysov.
Sımfonııalyq orkestr, Táttimbet atyndaǵy orkestr, djaz orkestri, «Aqqý» folklorlyq-horeografııalyq ansambli, «Arqa sazy» folklorlyq ansambli jáne «Mereı», «Áýen», «Araı» ansamblderinen quralǵan el súıip tyńdaıtyn ujym Qazaqstan kóleminde ǵana emes, Azııa, Amerıka, Eýropa elderinde túgelge derlik óner kórsetti. Qytaıdyń 35 qalasyna saparlap, bes myńdyq orny bar konserttik zaldardy aıaǵynan tik turǵyzyp, kórermen kóńilinde óshpes iz qaldyrdy. Bul jaıynda Táttimbet atyndaǵy akademııalyq halyq aspaptary orkestriniń dırıjeri, Qazaqstannyń eńbek sińirgen qaıratkeri Ábdýǵalısyn Shoqanbaev «Dúısen Úkibaı ketkennen keıin, KSRO halyq ártisi Shamǵon Qajyǵalıev keldi. Men sol kisiniń qasynda mol tájirıbe jınadym. Kómekshisi bola júrip kóp nárse úırendim. Shákeńniń arqasynda birlestik akademııalyq ataq alyp, Táttimbettiń aty berildi. Sol ýaqyttan bastap kóp dúnıe iske asa bastady. Úlken konserttik baǵdarlamamyzdy jasap, búkil respýblıka kóleminde óner kórsete bastadyq. Bizdiń negizgi maqsat – Arqa sazgerleriniń, kúıshileriniń ónerlerin nasıhattaý boldy. Sonymen qosa eýropalyq mýzykany da tastaǵan joqpyz. Jalpy, orkestrdiń repertýary jan-jaqty», dep eske aldy.
Al erekshe lırıkalyq mánerimen aıryqshalanatyn djaz mýzyka janry bizdiń elde keń tanyla qoımaǵan. Tipti úlken orkestr bar ekenin bireý bilse, bireý bilmes. Elimizdegi alǵashqy djaz orkestri 1994 jyly sol tustaǵy fılarmonııa dırektory Iаn Sımanovskııdiń bastaýymen osy birlestik quramynda qurylǵan bolatyn. Sol jyldyń jazynda kenshiler mádenıet saraıy alańynda shaǵyn orkestrdiń konsert qoıýymen, tusaýkeseri ótkende ónerpazdardyń talantyna kóńili toıǵan Iаn Sımanovskıı shaǵyn toptyń daıyn turǵan svıng quramy ekenin birden túsingen. Kóp uzamaı orkestr keńestik djaz klassıkalarynan bes shyǵarmany úırenip, «Shalqyma» konsert zalynda eń alǵashqy baǵdarlamalaryn kórermenge usynypty. Osylaısha, shaǵyn ǵana «Shalqymadan» bastaý alǵan orkestrdiń búginde óz tyńdarmandaryn tabýy óner jolyndaǵy úlken ıgiligi bolsa kerek. Kún ótken saıyn órisi keńeıip kele jatqan óner ordasynda ár jyldary belgili óner juldyzdary qyzmet etip, ujymnyń bedeliniń nyǵaıýyna, ósýine kóp kúsh saldy. Aıtkúl jáne Qanat Qudaıbergenovter ónerdegi alǵashqy qadamyn osy «Gákký» ansamblinen bastaǵan. Áıgili gıtarıst, «Mıýzıkola» tobynyń aranjırovshıgi «A stýdıo» tobynyń burynǵy oryndaýshysy bolǵan Bolat Syzdyqov ta 16 jasynda osy ansamblde shyǵarmashylyq jolyn bastaǵan edi. Qazaq mádenıetiniń shamshyraǵy syndy Qaraǵandy oblysynyń Qalı Baıjanov atyndaǵy konserttik birlestigi kúni búginge deıin bolashaq óner juldyzdaryn kóptep daıarlaıtyn rýhanııat ordasy bolyp qala bermek.
