Sıfrlyq damý, ınnovasııalar jáne aeroǵarysh ónerkásibi vıse-mınıstri Áset Turysovtyń aıtýynsha, 24 mamyrdaǵy jaǵdaı boıynsha Ashyq júıesine 1,7 mln paıdalanýshy tirkelgen. Bul rette 2 631 «qyzyl» jáne 2 074 «sary» mártebesi bar qazaqstandyq anyqtalǵan.
– Sońǵy kúnderi júıede bolǵan aqaýlar men tehnıkalyq problemalar úshin komandamen birge halyqtan keshirim suraǵym keledi. Nege bulaı boldy? Buǵan deıin aıtyp ótkenimdeı, Ashyq júıesi memleket menshigine ótti. Biz múliktik quqyqtardy qabyldap aldyq. Sondyqtan sońǵy kúnderi tolyq súıemeldeýge kóshý jáne «Ulttyq aqparattyq tehnologııalar» AQ operatoryna beıimdelý prosesi júrdi. Endi tehnıkalyq aqaýlardy bizdiń ulttyq operator qadaǵalaıtyn bolady, – dedi vıse-mınıstr.
Iаǵnı budan bylaı júıeni tehnıkalyq mamandar súıemeldep, tolyqtaı basqarady. Sonymen qatar mobıldi qosymsha únemi jańartylyp otyrmaq. 18 mamyrdan bastap Android platformasynda jańa nusqasy iske qosyldy. Onda QR-kodty skanerlemeı-aq mártebeni tekserýge múmkindik bar.
– Bógde adamnyń jeke sáıkestendirý nómirin (JSN) engizý múmkindigin boldyrmas úshin Ashyq qosymshasy mobıldi azamattar bazasymen biriktirildi. Qazir salystyrý júrgizilýde. Sondaı-aq vaksınalaý pasporty qyzmetimen de biriktirý jumysy jalǵasýda. Azamattar bir qosymshaǵa táýeldi bolmas úshin AITU qosymshasynda balama bar. Servıs basqa da tanymal mobıldi qosymshalar men saıttarda qoljetimdi bolýy úshin ekinshi deńgeıli banktermen kelissózder júrgizilýde, – dedi Á.Turysov.
Ashyq qosymshasy Nur-Sultan jáne Almaty áýejaılarynda jaqsy jumys istep tur. Kezek joq, dúrbeleń de bilinbeıdi. Sıfrlyq damý, ınnovasııalar jáne aeroǵarysh ónerkásibi mınıstrligi men «Atameken» ulttyq kásipkerler palatasynyń ókilderinen qurylǵan tekserý toby osyndaı baǵa berip otyr.
– Jeksenbi kúni «Astana arenada» fýtboldan el chempıonatynyń ortalyq kezdesýi ótti. Bul – karantınnen keıingi alǵashqy aýqymdy sporttyq shara. Bir stadıonǵa 6 myń adam jınaldy. Olardyń barlyǵy 2 saǵattyń ishinde qosymsha arqyly ishke endi. Bir «sary» mártebesi bar kelýshi anyqtaldy. Barlyǵy oıdaǵydaı ótti. Ýaqyt óte kele, osy tájirıbeni basqa arenalarda da qoldana alamyz jáne tipti kelýshiler sanyn 30 paıyzǵa deıin arttyrýǵa múmkindik bar, – deıdi «Atameken» UKP basqarma tóraǵasynyń orynbasary Iýlııa Iаkýpbaeva.
Onyń pikirinshe, bas memlekettik dárigerdiń jańa qaýlysyndaǵy talaptar aımaqtyq talaptarǵa sáıkes keledi. Sondyqtan bızneske Ashyq-pen jumys isteý áldeqaıda jeńil. Qaýly sheńberinde jobaǵa keste boıynsha Shymkent, Túrkistan, Aqtaý, Qostanaı áýejaılary, lotereıa klýbtarynyń jumysy engizildi (olar 2020 jylǵy naýryzdan bastap jumys istemegen). Budan bólek, bılıard, boýlıng jáne kompıýterlik klýbtardyń jumysy túngi saǵat 2-ge deıin uzartyldy.
Densaýlyq saqtaý mınıstrligi elektrondyq densaýlyq saqtaýdy damytý departamentiniń dırektory Beıbit Esenbaevtyń aıtýynsha, Ashyq jobasy vırýs juqtyrǵan nemese naýqaspen baılanysta bolǵan adamdardyń qoǵamdyq oryndarǵa barý múmkindigin shektep, azamattarǵa indet juqtyrýdy barynsha azaıta otyryp, shaǵyn jáne orta bıznestiń jumysyn qalpyna keltirýge múmkindik berdi.
– О́tken demalys kúnderi elimizdiń eki áýejaıynda PTR nátıjesi oń (qyzyl) nátıjeni kórsetken 14 adam jáne naýqaspen baılanysta bolǵan (sary) 32 adam anyqtaldy. Joba iske qosylǵan sátten bastap (12 sáýir) 2 631 «qyzyl» kelýshi jáne 2 074 baılanysta bolǵan tulǵa tirkeldi. Bir naýqas 4-6 adamǵa aýrý juqtyrýy múmkin. Osylaısha, Ashyq jobasyn engizý 10 myńǵa deıin adamdy indetti juqtyrýdan qorǵap qaldy, – deıdi B.Esenbaev.
Aıtpaqshy, 1 shildege deıin Ashyq mobıldi qosymshasyn «Vaksınalaý» modýlimen biriktirý josparlanyp otyr. Indetke qarsy vaksınanyń eki komponentin saldyrǵan azamattar oǵan kedergisiz ótetin bolady.
