Atalǵan jobaǵa búginge deıin bas-aıaǵy 133 nysan qosylǵan. Olardyń ishinde kópshilik bas qosatyn bıznes nysanmen qatar, teatr, mádenıet úıi men konsert zaldary da bar. Mysaly, qazir Ilııas Omarov atyndaǵy Qostanaı oblystyq qazaq drama teatryna kórermender tek Ashyq mobıldi qosymshasy arqyly ǵana kire alady. «Ashyqqa» tirkelgenderdiń tolyq tizimi jasalyp, Qostanaı oblysy ákimdiginiń resmı saıtyna ornalastyrylǵan.
– О́tken jumada bir jyldan artyq ýaqyttan beri jabyq turǵan karaoke-barymyz ashyldy. Mundaı múmkindikke Ashyq jobasy arqyly ıe bolyp otyrmyz. Men tek karaokege ǵana emes, ózimniń otbasylyq meıramhanam men jazǵy ashyq ashanama da QR-kod aldym. Endi búkil ujym bolyp jumysqa shyǵamyz. Bizge qoıylyp otyrǵan talap ta kóńilge qonady: bir kezekte 50 adamǵa deıin qabyldaı alamyz jáne túngi saǵat 2-ge deıin jumys isteıtin bolamyz. Osy salada júrgen soń, qalamyzdaǵy biraz qoǵamdyq tamaqtandyrý oryndarynyń ıelerin tanımyn. Olar da qýanyp jatyr, – dedi kásipker Baqyt Beıisova.
Ázirshe oblysta 86 nysan ǵana Ashyq-tyń tolyq qatysýshylary bolyp tirkelgen. 47 nysan testik rejimde jumys istep jatyr. Budan ózge 12 nysan tirkeýden ótý ústinde. Jobaǵa qosylýǵa ótinim bergenderdiń ishinde Ortalyq stadıon men «Tobyl Arena» syndy iri sport nysandary da bar.
– Ashyq-qa qosylyp jatqan bıznes nysandary men turǵyndar atalǵan jobaǵa erikti túrde qatysyp jatyr. Bul jobany engizýdegi basty maqsat – eń aldymen, qala turǵyndaryn indet juqtyrý qaýpinen saqtaý ekendigin esterińizge sala ketkim keledi. Bul qosymshany ornatqan ǵımaratqa koronavırýs juqtyrǵan adam kire almaıdy. Ásirese bıznestiń utatyn jeri kóp. Jobaǵa qatysqan kásiporyndar, tipti «qyzyl» nemese «sary aımaqqa» engen jaǵdaıda da jumysyn toqtatpaıdy, – dedi oblystyq kásipkerler palatasynyń dırektory Murat Ábenov.
Ashyq ornatyp ashylǵan kópshilik orynnyń biri – FitnessBlitz fıtnes-ortalyǵy. Ol QR-kodty taıaýda ǵana alypty.
– Tirkelý kóp ýaqyt alǵan joq. Aldymen qosymshamen ózimiz tanysyp alǵan soń, bul týraly turaqty klıentterimizge habar beremiz. Aldaǵy kúnderi osy QR-kod arqyly jumys isteı bastaımyz. Ashyq jobasyna qatysýdaǵy maqsatymyz – birinshiden, biz óz klıentterimizdi indet juqtyryp alýdan qorǵaýymyz kerek. Ekinshiden, bul qosymsha shyqpaı turǵanda bizdiń fıtnes-ortalyq epıdemııalyq jaǵdaıǵa baılanysty kópten beri jumys istemeı qalyp, qyrýar shyǵynǵa battyq. Ashyq qosymshasymen biz endi «qyzyl aımaqtan» da qoryqpaımyz, – dedi FitnessBlitz fıtnes ortalyǵynyń dırektory Renat Kım.
Qostanaı oblysy
