Marqum bolǵan 15 jastaǵy Dıana Hamýteskaıanyń jaqyndary quzyrly oryndardan onyń uıaly telefonyn jáne ózge jeke zattaryn tekserýdi talap etip otyr.
«Qoıyn dápteri adam shoshyrlyq satanısttik sıpattaǵy nebir sýretke toly», deıdi týysy.
Almaty oblysyndaǵy Jápek batyr aýylynda bútin bir otbasy qara jamyldy. Osydan tórt kún buryn órimdeı 15 jasar qyzynyń qorada tósek jaımasyna asylǵan óli denesin anasynyń ózi alyp shyqqan. Qaıǵydan qan jutqan Baqytty Aıtmuratova Dıananyń mundaı áreketke barýyna esh sebep bolmaǵanyn aıtady. О́ıtkeni 9-synypty úzdik bitirip, attestat alatynyna qýanyp júripti.
«Saǵat 3-te «dúkende sizdiń ornyńyzǵa turamyn, siz demalyńyz» dedi. Biraq aıtylǵan ýaqytta kelmedi. Telefony óshirýli boldy. Kórshime habarlasyp, úıdi tekserýin suradym. Esh jerde joq degen soń, ózim kelip qaradym. Tappaı, qurbysymen mekteppen qoshtasý keshine daıyndalyp júrgen bolar dedim. Ájethanaǵa jaqyndaı bergenimde qarsy bettegi qoradan áppaq jaımanyń ilýli turǵanyn kórdim. Ári qaraı esimde eshteńe joq», deıdi marqumnyń anasy.
Marqumnyń týystary Dıanany eki kún buryn jer qoınyna tapsyrǵan. О́mirge qushtar qyzdarynyń bul áreketke qalaı barǵanyn túsinbeı dal. Sebebin izdeýge tyrysqan olar kúndeliginen qorqynyshty sýretterdi kórip, jaǵasyn ustap otyr. Bulardy anasy alǵashynda tek shımaı dápteri dep oılaǵan. О́ıtkeni bastapqy betine tek armandaryn túsirgen. Alaıda sýretti de jaqsy salatyn Dıana ishki jaǵyna ólimge ıtermeleıtin túrli úreıli beıneler men jazý jazypty. Birinde: «Men ólimnen qoryqpaımyn. Eń qymbat adamdarymnan aıyrylyp qalýdan qorqamyn» dese, endi birinde tipti qanmen sýret salǵan. Osylaısha jaqyndary bul sýısıd jasaýǵa ıtermeleıtin «Sınıı kıt» oıyny ekenine senimdi.
«Túngi 2-den kelip tańǵy 6-ǵa deıin otyrdym. Bárin aqtardym. О́zinen ózi oınap-kúlip júrgen balanyń sóıte salýy múmkin emes dep, ózim tergeý jasadym, dápterin aqtardym. Bir sekta sııaqty», deıdi týysqan aǵasy Muratbek Aıtmuratov.
Sondaı-aq №4 orta mektep dırektorynyń tárbıe isi jónindegi orynbasary Quralaı Kóshegenova onyń jalpy sabaqtan sebepsiz qalmaıtynyn jáne minezi ashyq bolǵanyn aıtady.
«Synyptastarymen, ustazdarymen belsendi qarym-qatynasta júretin úlgili oqýshy bolatyn. Úzdik attestattyń úmitkeri. Osy qyzdan dál osyndaı shyǵady dep oılaǵan joqpyz. Ne ıtermelegenin, tipti ózimiz de túsinbeı otyrmyz», deıdi muǵalim.
Dál osyndaı qaıǵyly oqıǵalar kórshi aýyldardarda da bolypty. Bulardyń barlyǵyna ınternet arqyly taraǵan satanısttik sıpattaǵy qaýipti oıyndar sebep bolýy múmkin. Alaıda quzyrly oryndar tergeýdi tereńnen bastaýdyń ornyna, isti jáı ǵana sýısıd dep jyly jaýyp qoıyp jatyr dep qapaly. Al polısııa departamenti tergeý toqtamaǵanyn aıtady.
Almaty oblysy PD resmı ókili Aqbota Qýanyshbekqyzy atalǵan is boıynsha QR QK-tiń 105-bap, 3-bóligi, ıaǵnı ózine qol jumsaý faktisimen sotqa deıingi tergeý júrgizilip jatqanyn málimdedi. Osy oraıda sot medısınalyq-saraptama taǵaıyndalǵan.
«Bastapqy qorytyndysy kórsetip otyrǵandaı, jasóspirimniń ólimine tynys alý joldarynyń mehanıkalyq asfeksııasy sebep bolǵan. Sotqa deıingi tergep-tekserý jalǵastyrylyp jatyr», deıdi PD resmı ókili.
