Tekeli qalasyndaǵy eki qabatty bul úı úsh jyl buryn apatty dep tanylǵan.
«Búgin saǵat 11:30 shamasynda úıdiń tóbesi qulady. Balam ishinde uıyqtap jatqan. Qulaǵan daýysynan oıanyp, men júgirip úıge kirip, eki kishkentaı balamdy alyp shyqtym. Qazir bir ólimnen qaldyq. Bir úıde jeti janbyz», deıdi Tekeli qalasynyń turǵyny Jigerhan Adaıhanuly.
Qańyraǵan eki qabatty úıdi pana etken jalǵyz otbasy qazir úıindiniń ortasynda úreımen ómir súrip otyr.
12 páterli bul úıde Adaıhanulynyń januıasy ǵana turyp jatyr. Sebebi, bul otbasynyń basqa barar jeri joq. Al tóbesi, irgesi shirip, qulaǵaly turǵan apatty úıden jalǵyz shańyraqty ákimdiktegiler basqa jerge kóshirýge kómek kórsetpegen.
Bıýdjette aqsha joq dep jyly shyǵaryp salyp otyrǵan. Jalpy Tekeli qalasynda osyndaı apatty 19 eki qabatty úı bar. Surqynyń ózi adamdy shoshytady. Murjasyn terezeden shyǵarǵan turǵyndar osynda amaldap ómir súrip jatyr.
«Osy úıge 2020 jyly bıýdjetke usynys engizilgen. Alaıda áli aqsha qarajat bólinbegen. Qazir osy jartyjyldyqta qaıtadan aqshaǵa suranys jiberemiz», deıdi Tekeli qalalyq turǵyn úı-kommýnaldyq sharýashylyǵy bóliminiń basshysy Aıan Rysbekov
