Bul oqý orny qaladaǵy úzdik bilimimen ǵana emes, tárbıege de zor mán beretin erekshe mektep bolyp sanalady. Mektep shákirtteri syrttan kelgen adamdy quraq ushyp, jyly amandasyp qarsy alady. Ata-analar da úmit etken kózderiniń nuryn osy bilim oshaǵynda oqytýǵa tyrysady. Tártip pen tárbıe bar jerde nátıje de jaqsy. Bıylǵy naýryz aıynda bolǵan pán olımpıadasynda osy lıseıdiń 39 oqýshysy túrli deńgeıdegi medaldar alyp, jalpy esep boıynsha oblystaǵy eń úzdik oqý orny atandy. Al lıseılerdiń ustazdary arasynda bolǵan konkýrsta atalǵan mekteptiń 3 muǵalimi júldeger boldy. Bir qyzyǵy, mundaǵy ustazdardyń jartysynan kóbi elimizdiń ár túkpirindegi osy ispetti lıseılerdi bitirgen túlekter.
Bıyl mektep bitirgeli otyrǵan 46 túlektiń beseýi «Altyn belgige», altaýy «Úzdik attestatqa» úmitker. Sonyń ishinde Darıǵa Janǵýjınova, Arýjan Qaýjan, Danııa Amangeldi, Aıajan Baltabaeva, Arýjan Jahına «Altyn belginiń» úmitkerleri atansa, al «Úzdik attestatqa» Amıra Abaı, Dármen Áýelbek, Alına Tileýimbetova, Arýjan Qýanyshpaı, Darıǵa Qurmash, Dıas Jumabaı úmitker bolyp otyr. Mektep dırektory Erden Jaqsymbetovtyń aıtýyna qaraǵanda, munda elimizdiń soltústik óńirlerinen kelgen jasóspirimder oqıdy. Búgingi bitirip jatqan túlekterdiń arasynda oblys aýdandary ǵana emes Aqmola, Pavlodar oblysynyń, Nur-Sultan, Almaty qalalarynyń ókilderi bar.
Túlekter júrekterin dirildetken, erinderin kúbirletken «sońǵy qońyraýǵa» qatysyp, bir-birin quttyqtap, qushaqtap, ómirlerindegi erekshe merekeni bastan keshirdi. Solardyń arasynan Nur-Sultan qalasynan kelip oqyp jatqan Ińkár Baıdalyny sózge tartqanymyzda: «Jyly uıa – mektebimdi qımaımyn. Birge oqyǵan qurbylarym men tamasha ustazdarymdy saǵynatyn shyǵarmyn. Endi tek UBT-ny jaqsy tapsyryp, armandaǵan oqý ornyna túsýim kerek. Barlyq alǵan bilimimdi, kúsh-jigerimdi soǵan jumsap, ata-anamnyń úmitin aqtaýǵa tyrysamyn», dedi ol. Zor úmitpen alǵa basqan qadamdaryńa gúl bitsin dep tiledik biz.
PETROPAVL
