Halyqaralyq Túrki akademııasynyń prezıdenti Darhan Qydyráli ashyp, júrgizip otyrdy. «Bul kıeli shaharda barsha túrkiniń rýhanı dińgegi Ázireti Qoja Ahmet Iаsaýı babamyz ben aıaýly handarymyz ben danagóı bılerimiz máńgilikke tynym tapqan. Búgin, mine osy Iаsaýı dáýirinde, qasterli Túrkistan topyraǵynda budan 1000 jyl buryn túrki tiline aýdarylǵan qasıetti «Quran Kárim» kitabynyń saltanatty tusaýkeserine jınalyp otyrmyz. Elbasy Nursultan Ábishuly Nazarbaev pen Túrkııa Prezıdenti Taıyp Rejep Erdoǵannyń alǵy sózimen jaryq kórgen bul qasıetti Quran-Kárimniń basylýyna yqpal jasap, septesken túrki memleketteriniń basshylary sharamyzǵa qoldaý bildirip otyr. Túrkistannyń ıslam órkenıetiniń ejelgi altyn besigi ekenine taǵy bir márte aıǵaq bolarlyq aıtýly sharaǵa túrki dúnıesiniń kórnekti tulǵalary, qanattas uıym basshylary, baýyrlas elderdiń dıplomattary qatysýda», dedi Darhan Qydyráli.
Qasıetti Quran-Kárimniń tusaýkeser saltanatyna TÚRKSOI uıymynyń Bas Hatshysy Kaseınov Dúısen Qorabaıuly men «Bilge Túrik mádenıet qory» basqarma basshysy, eks-gýbernator Týna Gúngór Azım myrza ortaǵa shaqyrylyp, tusaýkeser rásimi ótkizildi. Atalmysh kıeli kitaptyń eki danasy oblys ákiminiń orynbasary Sáken Qalqamanovqa jáne Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń rektory Janar Temirbekovaǵa tabys etildi. Iаǵnı kitap Táýelsizdikpen qurdas ári eki el ashqan oqý ornyndaǵy jáne jaqynda Elbasy joǵary baǵa bergen oblys ortalyǵyndaǵy kitaphanaǵa qoıylady. Konferensııaǵa, sondaı-aq Syrtqy ister mınıstrliginiń Erekshe tapsyrmalar jónindegi elshisi Erjan Muqashev, Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov, Túrkııa Respýblıkasynyń Almaty qalasyndaǵy Bas konsýly Alı Rıza Akyndjy, «Bilge Túrik» mádenıet qorynyń basqarma tóraǵasy, eks-gýbernator Gýngór Azım Týna sonymen qatar zııaly qaýym ókilderi men tanymal ǵalymdar qatysty.
Halyqaralyq Túrki akademııasy basyp shyǵarǵan kitap bizdiń zamanymyzǵa jetken Quran aýdarmasynyń eń kóne ári tolyq nusqasy sanalady. Búginde bul qoljazba Ystambul qalasyndaǵy Túrik jáne Islam óneri mýzeıinde saqtaýly tur. Túrkistan topyraǵynda týyp, jetilgen ǵulamalar sýsyndaǵan myńjyldyq mura osylaısha túrkologııa, til dáne din máselelerine qyzyǵýshylyq tanytatyn ǵalymdar men izdenýshilerge qoljetimdi bolyp, tolyq faksımıle nusqasynda tuńǵysh ret jarııalanyp otyr.
Keleli keńeske qatysýshylar Elbasy bastamasymen qaıta túlegen Túrkistan jáne onyń túrki álemindegi mańyzy týraly oılaryn ortaǵa salyp, baýyrlas elderdiń birligi jaıynda paıymdy pikirlerimen bólisti.
