Saıram aýdandyq Polısııa basqarmasyna mal sharýashylyǵymen aınalysatyn jergilikti turǵyn aryzdanǵan. Er adamnyń aıtýynsha, ol 37 bas iri qara malyn (1-1,5 jasar aq bas surypty buqa) Qyrǵyzstan Respýblıkasyna satý úshin ózine jaqyn tanys emes eki azamatqa senip tapsyrǵan. Alaıda bes kúndeı ýaqyt ótse de senim bildirgen adamdarynan habar bolmaǵan.
Atalǵan jaıt QR QK-niń 189-babymen (Senip tapsyrylǵan bóten múlikti ıemdenip alý nemese talan-tarajǵa salý) tirkeýge alynyp, oryn alǵan qylmysty sotqa deıingi tergep-tekserýdiń biryńǵaı tizilimine tirkegen saıramdyq tártip saqshylary, shuǵyl izdestirý sharalaryn júrgizgen. Jábirlenýshiniń jaýaby, basqa da kelip túsken aqparat kózderi arqyly kúdiktilerdiń jeke-basy anyqtalady. Polıseıler kinálilerdiń izine túsip, olardy Shymkent qalasyna jasyrynǵan jerlerinen ustap, Polısııa basqarmasyna jetkizedi. Kúdiktiniń ekeýi de jergilikti turǵyn bolyp shyqty.
Belgili bolǵandaı ustalǵan ekeý ózderiniń basqa taǵy úsh tanysymen birlesip, quny 21 mıllıon teńgeden astam turatyn buqalardy tıisti jerge aparmaı, Saıram aýdanynda birneshe adamǵa arzan baǵaǵa satyp úlgergen. Aqshalaryn bólip alyp, óz qajettilikterine jaratqan. Búginde polıseıler ózgeniń malyn talan-tarajǵa salǵan kúdiktilerdiń ekeýin qamaýǵa alsa, qalǵan úsheýine qatysty izdestirý jumystaryn júrgizýde. Odan bólek, tártip saqshylary satyp alǵan turǵyndardan iri-qara maldardyń 26 basyn aıǵaqty zat retinde tárkilep, zańdy ıesine qaıtardy.
