Is boıynsha sot talqylaýy Almaty oblysynyń Ile aýdandyq sotynda ótip jatyr. Oqıǵanyń sebepteri men mán-jaıyn anyqtap, tóreligin shyǵaratyn sýdıa Erken Seıitov.
Aıyptalýshylar tarapynda Abzal Qalenov, Erik Baqtybaev, Nıkıta Ohotskıı, Azamat Rasýlov, Jarqyn Japelov jáne Oljas Baıturǵanov bar. Bári oqıǵanyń mán-jaıyn tergeý sátinen bastap qamaýǵa alynǵan. Olarǵa QR QK-nyń 293-baby 3-bóliginiń 2-tarmaǵynda kózdelgen qylmysty jasady degen aıyp taǵylyp otyr.
«Bul buzaqylyq, ıaǵnı qoǵamdyq tártipti buzý, azamattarǵa zorlyq-zombylyq kórsetý, sondaı-aq bótenniń múlkin joıý nemese búldirý, ádepsiz áreketter jasaý qarý-jaraq, pyshaq, jezden jáne basqa densaýlyqqa zııan keltirýge beıimdelgen zattardy qoldaný arqyly adamdar toby jasaǵan áreket», delingen bap sıpattamasynda.
Sottalýshylarǵa úsh jyldan jeti jylǵa deıin bas bostandyǵynan shekteý nemese aıyrý túrindegi jaza kózdelgen.
Eske salaıyq, 2020 jylǵy 31 qazanda Almaty mańyndaǵy Baıserke aýylynda ornalasqan demalys ornynyń ıesi men qyzmetkerleri oq jaraqatyn alǵany habarlanǵan bolatyn. Polısııadaǵylardyń aıtýynsha, maska taqqan 15-20 adam demalys ornyna kelip, sol jerde mekeme ıesimen - 1980 jyly týǵan er adammen janjaldasyp qalǵan. Sodan soń olar oq atqan. Artynsha oqıǵa ornynan sur tústi Mercedes w140 jáne aq tústi Mercedes kóligimen qashyp ketken. Negizgi kúdiktiler Almaty qalasy, Almaty, Qostanaı oblystarynda ustalyp, qamaýǵa alynǵan.
