Oral qalasynda arnaıy qyzmet oryndarynyń kezekshi bólimine turǵyndardan mekenjaılardy sý basyp jatqany jóninde 400-den asa qońyraý túsken.
Batys Qazaqstan oblystyq Tótenshe jaǵdaılar jónindegi departament janynan jedel shtab qurylyp, 55-40-88 telefon nómiri arqyly qońyraý qabyldaýǵa kiristi. 4 maýsym kúngi tańerteńgi jaǵdaı boıynsha, Oral qalasy turǵyndarynan 59 nysandy sý basqany jóninde aqparat túsken. Odan bólek, departamenttiń kezekshi bólimine – 8, «112» qyzmetine – 272, «109» qyzmetine – 151 turǵyn qońyraý shalyp, kómek suraǵan.
3 maýsym kúni túnde Oral qalasynyń birqatar bóliginde jaryq sónip, sý berý toqtatylǵan edi. Qalany sýmen qamtıtyn «Batys sý arnasy» mekemesiniń 1968 jyly salynǵan №3 kárizdik-sorǵy stansasynda kárizdik kollektor jarylyp, túngi saǵat 02.00. shamasynda mashına bólimin sý basqan eken. Sóıtip, túngi saǵat 03.00-den bastap Oral qalasyna sý berý toqtatylǵan. Sol kezden bastap 23 qyzmetker, 8 tehnıka apattyq jóndeý jumystaryna kirisip, toqtap qalǵan 5 sorǵynyń ekeýin tańda iske qosty. Qalaǵa sý berile bastady. Qutqarýshylar búgin kúndiz qalǵan sorǵylar da jumysyna kirisedi dep jatyr.
3 maýsym kúni keshki saǵat 21.00.-dan bastalǵan nóser jaýynnyń áserinen oblys ortalyǵynda 7 jeke turǵyn úıdi, 40-tan asa aýlany, 8 áleýmettik nysannyń jertólesin sý basqan.
«Tótenshelikter men jergilikti atqarýshy organ qyzmetkerleri túni boıy tynym tapqan joq. Tańǵy saǵat 9-ǵa deıin 2045 tekshemetr sý sorylyp alyndy. Qutqarý jumystaryna 125 adam, 45 tehnıka qatysty. Ishki ister qyzmetkerleri de túngi kezekshilikte birge júrdi», deıdi Batys Qazaqstan oblystyq Tótenshe jaǵdaılar departamenti baspasóz qyzmetiniń ókili Ánel Qaınedenova.
«Qazgıdromet» mekemesiniń habarlaýynsha Batys Qazaqstan oblysynda qatty jel, nóser jaýyn men burshaq qateri áli de bar.
Tabıǵattyń tosyn minezinen jolaýshylar da zardap shekti degen edik. 3 maýsym kúni Jánibek aýdany, О́negeaýylynyń tusynda 6 adammen jolda batpaqqa batyp qalǵan »Largýs» avtokóligin №21 órt sóndirý beketiniń qyzmetkerleri qutqaryp aldy. Jolaýshylar Almaty qalasynan Jánibek aýdanyna kele jatqan adamdar eken.
Sol kúni Qaztalov aýdany, Aqkól aýyldyq okrýgi, Tóremurat qystaǵy mańynda «VAZ» avtomobıli laısań balshyqqa keptelip, 6 adam, onyń úsheýi bala, dalada qalǵan. Olardy №17 órt sóndirý beketiniń jeke quramy qutqardy.
3 maýsym kúni keshkisin Oral qalasy «Metalıst» zaýytyn mańynda Jaıyq ózenine mas kúıinde sýǵa túsip, aǵyp kete jazdaǵan 30 jasar kelinshek qutqaryldy. Osyǵan oraı Batys Qazaqstan oblysy Tótenshe jaǵdaılar departamenti sýǵa batyp ketýden adam ómirin qutqarý kezinde kórsetken erligi men qaısarlyǵy úshin Vıtalıı Sıplıvyıdy alǵys hatpen marapattady.
