Memleket basshysy Qasym-Jomart Toqaevtyń alǵashqy Joldaýynda bergen tapsyrmasyna sáıkes pedofılııaǵa qatysty zańnama 2019 jyly aıtarlyqtaı qataıtylǵany málim. Qazir Qylmystyq kodeks boıynsha pedofılderge jasaǵan qylmysynyń aýyrlyǵyna qaraı 20 jylǵa nemese ómir boıy bas bostandyǵynan aıyrýǵa deıingi qatań jazalar kesiledi. Al jas balaǵa qatysty ata-anasy, ógeı ákesi, ógeı sheshesi, pedagog ne ony tárbıeleý jónindegi mindetter júktelgen ózge adam kúsh qoldanbaı jasaǵan azǵyndyq is-áreket úshin 10 jyldan 15 jylǵa deıingi merzimge bas bostandyǵynan aıyrý jazasy kózdelgen. Soǵan qaramastan, qatań zań kúshine engen ótken jyly elimizde balalardyń jynystyq qolsuǵylmaýshylyǵyna baılanysty 300-den astam qylmys tirkelgen. Ishki ister mınıstrligi júrgizgen taldaý pedofılderdiń 80 paıyzy – jábirlenýshilerdiń otbasy músheleri nemese jaqyndary ekendigin kórsetken.
Osy rette oılanarlyq jaıt ta bar. Ol – ógeı balanyń óz anasyn qyzǵanyp, ógeı ákesine jala jabýy. Máselen, jýyrda elordada turatyn, jasy alpysty alqymdaǵan áıel bizge jalǵyz uly Armannyń (esimi ózgertildi – K.M.) osyndaı jaladan jazyqsyz túrmege qamalǵandyǵyn aıtyp, muńyn shaqty. Oqıǵa bylaı bolǵan eken:
Arman osydan on shaqty jyl buryn súıip qosylǵan áıelimen aralary sýyp, ajyrasyp ketedi. Sóıtip júrgende ózi sııaqty jubaıymen aıyrylysqan, bir kishkentaı qyzy bar jas kelinshekpen kóńil qosyp, ekinshi ret úılenedi. Muny estigen álgi kelinshektiń qaıyn áke-sheshesi kelip, súıikti nemerelerin ózderi tárbıelegisi keletindigin aıtyp, qolqa salyp, bes jasar qyzdy alyp ketedi.
Arman ekinshi áıelimen birge segiz jyldaı bıznespen aınalysyp, tatý-tátti turmys keshedi. Odan eki perzent súıedi. Kelinshegine sengeni sonshalyq, ómir boıy jıǵan dúnıe-múlkiniń barlyǵyn onyń atyna jazdyrady. Mańdaıynyń soryna qaraı, byltyr ata-ájesimen birge aýylda turyp jatqan 13 jasar ógeı qyzy kútpegen jerden astanaǵa kelip, endi anasymen birge turǵysy keletindigin aıtady. Áıeliniń qabaǵyna qarap úırengen Arman birden kelisimin beredi. Biraq elordaǵa kelgen kúninen bastap ol qyz ógeı ákesin jaqtyrmaıtyndyǵyn sezdire bastaıdy. Mektepte birge oqıtyn qurbylaryna sheshesin ógeı ákesinen ólerdeı qyzǵanatyndyǵyn, ony jek kóretindigin, sondyqtan olardy qalaıda aıyrylystyrýǵa tyrysatyndyǵyn aıtyp júredi.
Aqyry, aram pıǵylyn iske asyrýdyń birden-bir joly osy dep uıǵarsa kerek, bir kúni sheshesine: «О́geı ákem túnde saǵan bildirmeı, meniń jatqan bólmeme kirip, uıyqtap jatqan meniń denemdi sıpalap ketýdi shyǵardy. Ol kisiden qorqamyn. Maǵan arasha túskiń kelse, onymen aıyrylys», deıdi ótirik jylamsyrap. Sheshesi kúıeýimen ursysyp, onyń aqtalyp aıtqan sózine senbeı, ashý ústinde polısııaǵa habar beredi. Jedeldetip jetken polıseıler áı-shaıǵa qaramaı, Armandy tutqynǵa alyp, tergeý oqshaýlaǵyshyna aparyp toǵytady. Aqyry oǵan ógeı qyzy men áıeliniń kórsetindisine súıengen birinshi ınstansııadaǵy sot 10 jylǵa bas bostandyǵynan aıyrý týraly úkim shyǵarady.
Keıin Armannyń áıeli qyzynyń qyzǵanyshpen kúıeýine jala japqandyǵyn bilip, barmaǵyn tistep ókinip, qylmystyq isti júrgizgen tergeýshige kelip shynyn aıtqanda ol: «Jubaıyńyzǵa jala japqandyǵyńyz úshin túrmege qyzyńyzben birge otyrǵyńyz kelmese, isti qaıta qaraý týraly endi eshkimge tis jarmańyz», dese kerek – aıaq astynan úıi men ózge de múlkin dereý satyp, úsh balasymen birge tórkinine kóship ketipti. Al Armannyń anasy qazir ulyn arashalap alý úshin shaqshadaı basyn sharadaı qylyp, sharq uryp júr.
Budan túıer oı: pedofılııa boıynsha kúdikti ógeı ákege qatysty qylmystyq isti qaraǵanda tergeýshi men sýdıa ógeı balanyń anasyna degen qyzǵanyshy faktoryn muqııat eskergenderi jón.
