Jelide «Shuǵyla» kınoteatry mańynda qaraýsyz júrgen kishkentaı qyzdyń sýreti jarııalandy.
«Bala áli jórgekte. Kishkentaı balany qalaı qaraýsyz qaldyrýǵa bolady?», delingen jazba sıpattamasynda.
Almaty polısııa departamenti baspasóz qyzmetiniń málimeti boıynsha, 8 maýsymda Túrksib aýdandyq PB-ǵa jergilikti turǵyndardan shaqyrtý túsken. Olardyń aıtýynsha, Palladın kóshesi boıynda Seıfýllın dańǵylymen qıylysqa jetpeı shamamen úsh jasar qyz qaraýsyz júrgen.
Polısııa bala men onyń anasynyń jeke basyn anyqtady. Bul kezde anasy jumysta bolǵan eken.
«Áıel qyzy 10 jastaǵy úlken ulymen úıde qalǵanyn aıtty. Uly uıyqtap jatqanda, qyz dalaǵa shyǵyp, joǵalyp ketken. 1994 jylǵy áıelmen aldaǵy ýaqytta mundaı jaǵdaıǵa jol bermeý týraly profılaktıkalyq áńgime júrgizildi. Otbasy turǵylyqty jeri boıynsha tekserildi», dedi Túrksib aýdandyq PB janyndaǵy polısııa bóliminiń bastyǵy polısııa polkovnıgi Erkin Amantaev.
