Sýretti túsirgen Dmıtrıı Erofeev
Onyń ónimderi – zamanaýı naryqtaǵy básekege tótep beretin, sonymen qatar, dástúrli ádispen daıyndalatyn nan. On segiz jasynan kásipkerlikke den qoıǵan Erbolatqa bul sala tosyn emes. Degenmen, naýbaıshylyq – jaı tabys kózi emes, jan qalaýy. Naryqty muqııat saralaǵan ol kópshilikke tanys ónimdi jańasha sıpatta usynýǵa bolatynyn ańǵarǵan. Sóıtip, jarty jyl boıy Almaty qalasynda bilim alyp, tájirıbe jınaqtaıdy. Sol kezeńde tabıǵı ashytqynyń qasıetin tereń meńgerip, úı nanynyń shynaıy dámin saqtaýdyń qupııasyn úırenedi.
«Nan óndirisinde jańalyq ashý qıyn kórinedi. Biraq sapa men tabıǵılyqqa basymdyq berý arqyly tutynýshynyń júregine jol tabýǵa bolady», deıdi kásipker.
Erbolattyń basty ustanymy – ónimniń tabıǵılyǵy. Onyń naýbaıhanasynda óndiriletin jeti túrli nannyń barlyǵy da kádimgi tabıǵı ashytqymen ázirlenedi. Iаǵnı quramynda jasandy qospalar joq. Jergilikti dıirmennen alynatyn un men tabıǵı ıngredıentter ǵana paıdalanylady. Mundaı tásil nannyń sińimdiligin arttyryp, dámin baıytady. Qol ashytqynyń baıaý jetilý úderisi arqyly daıyndalǵan ónim uzaq saqtalyp, aǵzaǵa jeńil sińedi. Bul – densaýlyǵyna mán beretin tutynýshylar úshin úlken artyqshylyq.
Qazir shaǵyn kásiporynda alty adam turaqty eńbek etedi. Kún saıyn 350-ge jýyq ónim pisirilip, oblys ortalyǵyndaǵy 25 dúkenge jóneltiledi. Tańǵy ýaqyttaǵy naýbaıhanada jańa pisken nannyń erekshe ańqyǵan ıisi ujymdy da, tutynýshyny da baýrap alady. Taldyqorǵan naryǵyn jiti zerttegen kásipker dál osy baǵytta bos keńistik baryn baıqaǵan. Sóıtip, qoldan pisiriletin, tabıǵı ádispen daıyndalatyn nan túrin óńirge alǵashqylardyń biri bolyp usyndy.
«Nan bizdi otbasymyzdyń tarıhymen, salt-dástúrimizben, mádenı muramyzben baılanystyrady. Sondyqtan naýbaıhanama «Erental» dep atamnyń esimin berdim. Qol ashytqymen daıyndalatyn nan pisirýge kóbirek ýaqyt ketedi, óıtkeni úderistiń basym bóligi qolmen atqarylady. Qazir tartın nanyn, dándi jáne múkjıdek qosylǵan nan, dándi baget, borodıno nany men qara bıdaı nanyn, chıabatta men qaraqumyq chıabattasyn pisiremiz. Sonymen qatar kún saıyn 60 bólke nan pisiremiz. Suranys bolsa, krýassan, sınnabon, pirándik, samsa, basqa da túrli nan-toqash ónimin daıyndaýǵa múmkindigimiz bar. Qajetti qural-jabdyqtarymyz da, ósip-órkendeýge degen nıetimiz de jetkilikti», deıdi E.Erentalov.
Onyń aıtýynsha, kásiporyn aldaǵy ýaqytta ónim túrin kóbeıtýdi, óndiris kólemin ulǵaıtýdy jáne brendti respýblıka kóleminde tanytýdy josparlap otyr. Sapaly ónimge suranys árdaıym bar. Eń bastysy, senim men turaqtylyq.
Taǵy bir ereksheligi – naýbaıhanada nan qarqyndy muzdatý ádisinen ótkiziledi. Sonyń arqasynda ónimdi alys jerlerge tasymaldaýǵa múmkindik bar.
«Qazir naýbaıhanamyzdyń ónimi tek Taldyqorǵan qalasynda satylyp jatyr. Aldaǵy ýaqytta oblystyq, respýblıkalyq deńgeıge shyqsaq deımiz. Ol úshin eń aldymen sapaly ári paıdaly ónim óndirýge bar kúshimizdi salyp kelemiz. Árıne, memleket tarapynan qoldaý bolsa, óndiristi keńeıtip, assortımentti ulǵaıtýǵa daıynbyz. Ár adam ómirde óz ornyn taýyp, tabysqa jete alady dep sanaımyn. Ol úshin óz isińdi súıip, ony jan-tánińmen berile isteýiń kerek», deıdi ózi.
Jas kásipkerdiń bul bastamasy – Jetisýda shaǵyn jáne orta bıznestiń damýyna serpin beretin jarqyn mysal. Tabıǵı ónimge degen suranys artqan saıyn osyndaı adal eńbekke negizdelgen jobalardyń da ǵumyry uzaq bolary anyq.
Jetisý oblysy
