Epıdemıolog aýrýdan keıin antıdeneler alty aı boıy saqtalatynyn aıtty. Vaksına almaı turyp aldymen antıdenege IFT-test tapsyrý kerek. Eger vaksınanyń birinshi dozasyn alǵan naýqas aýyryp qalsa, ekinshisin saldyrý úshin alty aı kútý qajet.
«Eger antıdeneler sany belgili bir tıtr mólsherinen asyp ketse, onda vaksına alýǵa bolmaıdy. Al antıdeneler sany az bolsa vaksına qajet, áıtpese aýyryp qalýyńyz múmkin. Ár aǵzanyń derbes jáne antıdenelerdiń joıylý jyldamdyǵy ártúrli ekenin túsiný kerek», dedi epıdemıolog.
Sonymen birge ol vaksınanyń qalaı áser etetinin túsindirdi.
«Azamat ekpe pýnktine keledi, kelisimge qol qoıady, terapevtten medısınalyq tekserýden ótedi jáne osydan keıin ǵana deltoıdty bulshyqetke vaksınanyń birinshi dozasyn alady. Sodan keıin beıdj berilip kútý aımaǵyna jiberiledi, onda otyz mınýt mamandardyń baqylaýynda bolady», deıdi ol.
Onyń aıtýynsha, vaksınany 18 jasqa deıingi adamdar, júkti jáne emizetin áıelder, allergııalyq reaksııalar men sozylmaly aýrýlary bar adamdardan basqalar alýǵa tıis.
