Aýyzdyǵymen alysyp, jutynyp turǵan sáıgúlikterge er salynyp, kerek-jaraq dúnıe qanjyǵaǵa baılandy. Tarıh tylsymyna boılaýǵa qulshynǵandar Selınograd aýdanynyń aýmaǵyndaǵy ejelgi Bozoq qalasy mańynda atqa qondy. Sóz arasynda Bozoq qalasynyń Uly Jibek jolyndaǵy qypshaq bıleýshileriniń áskerı ordasy bolǵanyn aıta ketelik. Tarıhshylardyń tarazylaýyna qaraǵanda, qalanyń gúldenýi túrki jurtynyń ishinde qypshaqtardyń bedeli kóterilgen H-HI ǵasyrlarǵa sáıkes keledi.
Ejelgi qaladan atqa qonǵan ekspedısııaǵa Mádenıet jáne sport mınıstrligi, Ulttyq mýzeı, Aqmola oblysynyń ákimdigi, Botaı qoryq-mýzeıi qoldaý kórsetip otyr.
Tuńǵysh ret aıshylyq alys jolǵa attanǵan ekspedısııa Nur-Sultan-Jıdebaı baǵytynda myń shaqyrymdyq joldy jele jortyp ótpek. Jaı ǵana júris emes, ejelgi tarıh soqpaǵynda el esinde saqtalǵan tiri ańyz, tirshilik sulbasyn súzý maqsat etilýde. Jol-jónekeı Pavlodar, Qaraǵandy, Shyǵys Qazaqstan oblysy aýmaqtaryndaǵy Oljabaı batyr, Edige bı, Máshhúr-Júsip Kópeıuly, Buqar jyraý, Abaı-Shákárim kesenelerin aralap, Qoıandy jármeńkesi ótken orynda at shaldyryp, ilgeri aspaq.
Ekspedısııa quramynda birneshe oblystyń ókilderi, negizinde tarıhshylar men jýrnalıster bar. Negizgi maqsat – halqymyzdyń san ǵasyr boı jalǵasyp kele jatqan dástúrlerin nasıhattaý, kıeli jerlerge qurmet kórsetý. Sol arqyly el nazaryn ózekti máselelerge aýdarý.
Aqmola oblysy
