QR Úkimetiniń 2020 jylǵy 29 jeltoqsandaǵy №908 «2021-2025 jyldarǵa arnalǵan jekeshelendirýdiń keıbir máseleleri jónindegi» qaýlysyna sáıkes, osy jyldarǵa arnalǵan «Jekeshelendirýdiń keshendi jospary» maquldanǵan. Jekeshelendirý nysandary eki mekeme arqyly júrgiziledi. Onyń ishinde, Atyraý oblysy ákimdiginiń 2021 jylǵy 11 aqpandaǵy №32 «Kommýnaldyq menshiktiń keıbir máseleleri týraly» qaýlysymen jekeshelendirýge jatatyn kommýnaldyq menshiktegi 10 uıymnyń satý kestesi belgilengen.
Olar: «Atameken-Atyraý» mıkroqarjy uıymy, oblystyq bilim berý basqarmasyna qaraıtyn «Qazaqstan geology» emdeý pansıonaty, oblystyq dene shynyqtyrý jáne sport basqarmasyna qaraıtyn boks boıynsha mamandandyrylǵan sport klýby, «Atyraý sý arnasy», «Atyraý oblysy sý arnasy», «Atyraý-Jas otaý» JShS-lary men Hıýaz Dospanova atyndaǵy Atyraý halyqaralyq áýejaıy. Taǵy úsh mekeme qalalyq jáne aýdandyq kommýnaldyq menshiktegi uıym sanalady, olar: «Saraıshyq-Atyraý» JShS, «Inder sý» ShJQ, «Jylyoısý» KMK. Bulardyń ishinde, Atyraý qalasynyń kommýnaldyq menshigindegi «Saraıshyq-Atyraý» JShS bıyl 6 sáýir kúni 695 mln teńgege keıinnen satyp alý quqyǵymen 5 jyl merzimge senimgerlikpen basqarýǵa berilgen.
Budan bólek, «Atyraý» áleýmettik-kásipkerlik korporasııasynyń da táýelsiz uıymdardyń jarǵylyq kapıtalynda qatysý úlesi bar. Úkimet qaýlysyna sáıkes, Qoǵamnyń (ÁKK) Dırektorlar keńesi bul uıymdardaǵy qatysý úlesin básekeles ortaǵa berý jóninde sheshim qabyldanǵan. Oǵan sáıkes, bıyl 6 nysan: «Alǵa», «Alǵa» mal ósirý kesheni», «LUMPAN CASPIAN PHARMACEUTICALS LLP», «Mııaly» servıstik daıyndaý ortalyǵy, «Dosjan ı Kompanııa», «InderTemirJoly» jáne «Alǵa» mal ósirý kesheni» JShS-lary; 2022 jyly 4 nysan: «Atyrau-Avtopark», «AkzhayikAvtopark», «Baıterek-2013» jáne «Nurly-tal» JShS-lary; 2023 jyly bir nysan: «ATMA - Atyraý áýejaıy jáne tasymaldar» AQ aýksıonǵa shyǵarylmaq. Aıta keteıik, Atyraý áýejaıy da 2023 jyly saýdaǵa shyǵarylady.
«Atyraý» ÁKK 2014 jyldan beri jekeshelendirýdiń ekinshi tolqynyna qatysyp keledi. Osylaısha, 2014-2015 jyldary 4 táýeldi kompanııadaǵy 3 252,7 myń teńgege baǵalanǵan Qoǵam úlesi 6 124,0 myń teńgege satyldy. 2015 jyly 2016-2020 jyldarǵa arnalǵan Jekeshelendirýdiń keshendi jospary qabyldandy. Sóıtip, 2016-2017 jyldary segiz, onyń ishinde, bir enshiles jáne jeti táýeldi kompanııadaǵy qatysý úlesi jekeshelendi. Olar 79 188,9 teńgege baǵalanyp, 98 318,6 myń teńgege satyldy», deıdi mekemeniń aktıvterdi basqarý jáne enshiles-táýeldi uıymdardy basqarý departamentiniń dırektory Nurlan Qappazov.
