Nur-Sultan ýaqytymen 21:50-de E tobyndaǵy Slovakııa men Ispanııa, Shvesııa men Polsha quramalary kezdesedi. Bul tórt komandanyń da kelesi kezeńge shyǵýdan úmiti bar. Toptaǵy oıyndar taǵdyry osy úshinshi týrda sheshilgeli tur. Kóshbasshy Shvesııa osyǵan deıin Slovakııany jeńip, ıspandarmen teń oınady. Slovakııa bolsa Polshadan basym túsken edi. Ispanııa shvedtermen de, polıaktarmen de teń oınap qaldy. Enshisinde 2 upaı ǵana bar. Bir kezdesýde jeńilip, bir kezdesýde teń oınaǵan Polsha quramasynda bir ǵana upaı bar. Soǵan qaramastan búgin Shvesııany jeńip, pleı-offqa aıaq sozǵysy keledi.
Mundaı ıntrıga F tobynda da bar. Nur-Sultan ýaqytymen 00:50-de Portýgalııa men Fransııa, Germanııa men Vengrııa kezdesedi. Bul jaqtyń da oıyndaryn boljap bolmaısyń. Portýgalııadan 0:3 esebimen jeńilgenine qaramastan, Fransııamen 1:1 esebimen teń oınap erlik jasaǵan Vengrııa búgin qalaıda Germanııany jeńýi tıis. Sonda ǵana kelesi kezeńge shyǵýdan úmittene alady. Alaıda Germanııanyń qandaı deńgeıdegi komanda ekenin, ótken týrda Portýgalııanyń eki aıaǵyn bir etikke qalaı tyqqanyn (4:2) jankúıerler umyta qoıǵan joq. Sondyqtan majarlardy búgin aýyr match kútip tur.
Portýgalııa men Fransııa matchyn fýtbol súıer qaýym «fınalǵa deıingi fınal» dep baǵalap jatyr. Germanııany avtogoldyń arqasynda áýpirimdep jeńip, Vengrııamen sensasııaly túrde teń oınaǵan Dıde Desham shákirtteri ázirge bul týrnırdiń jumbaq komandasyna aınalyp tur. Oıyndary júrmeı jatyr ma, álde bul ádeıi jasalǵan strategııa ma, ony tap basyp aıtý qıyn.
Alǵashqy jáne tórtinshi oıyndy Qazsport telearnasy kórsetse, ekinshi jáne úshinshi kezdesýlerdi Qazaqstan efırinen tamashalaýǵa múmkindik bar.
Keshegi oıyn kúninde Anglııa, Horvatııa jáne Chehııa quramalary pleı-offqa shyqty. Úsheýi de bir toptyń ókilderi. Anglııanyń nebári eki gol ǵana soǵyp, kelesi kezeńge shyqqany da tańǵalarlyq jaǵdaı boldy.
Jalpy alǵanda dál qazirgi ýaqytta pleı-off kezeńine 9 qurama joldama alyp qoıdy, olar – Italııa, Ýels, Belgııa, Nıderlandy, Avstrııa, Danııa, Anglııa, Horvatııa jáne Chehııa quramalary.
1/8 fınaldyń matchtary 26-29 maýsym aralyǵynda ótedi. Ár kúnge eki oıynnan josparlanǵan.
