Maǵjannyń otansúıgishtikke, týǵan el men jerge degen mahabbatqa toly ólmes shyǵarmalary taǵy bir jańǵyryp, oǵan bir sheti kıeli Mańǵystaýdyń, armandaı Alataýdyń, samal esken Saryarqanyń, jer jánnaty Jetisýdyń, arqyraǵan Atyraýdyń, qasıetti Túrkistannyń, altyn ana Altaıdyń, Abaı eli Semeıdiń jastary qatysyp, Qyzyljar topyraǵyn eki kún boıy dúbirletti.
Búgin, ıaǵnı 25 maýsymda týǵan kúni bolatyn túrki dúnıesi túgel tanyp, óneri men órisine bas ıgen Maǵjannyń týǵan kúni. Atalmysh shara osy kúnge oraı uıymdastyrylǵan eken. «Arystandaı aıbatty» jastarǵa senim artqan arqaly aqyn ózin HHI ǵasyrdyń jastary osylaı qurmetteıtinin kóregendilikpen bilip ketkendeı, konkýrsqa qatysqan jastar aqyn óleńderin erekshe shabytpen oqydy.
Bıylǵy konkýrs Táýelsizdiktiń 30 jyldyǵyna jáne qazaq tiliniń mártebesin arttyrýǵa baǵyttalǵandyqtan qatysýshylar aqyn óleńderindegi naq osy máselelerdiń astaryn aqtaryp, aqynnyń azamattyq ustanymyn ashýǵa tyrysty. Sonymen birge Maǵjannyń sulý, syrly poezııasynyń sheber órnekterin, estetıkalyq talǵamyn jastardyń boıyna darytý maqsaty da alǵa qoıylǵan. Konkýrsqa qatysýshylar Maǵjan óleńderin oqýdan ǵana emes, ózderiniń óleńderin aıtýdan, zertteý jumystaryn usynýdan da jarysty.
Oblystyq bilim basqarmasynyń bastyǵy Gúlmıra Kárimova bastaǵan qazylar alqasyna úsh nomınasııa boıynsha jarysqa túsken jastardyń jeńimpazdaryn anyqtaý ońaı bolǵan joq. Túrli nomınasııalar boıynsha birinshi oryndy Atyraýlyq Baqyt Eleýsinov, Nur-Sultandyq Ámirlan Erzatuly, Soltústik qazaqstandyq Danagúl Basybaı ıelendi. Al oblys ákimi taǵaıyndaǵan bas júlde atyraýlyq Nuraı Seısenbaıǵa buıyrdy.
Konkýrsqa qatysqandar arasynan arnaıy ókilder Qyzyljardaǵy Maǵjan eskertkishine gúl shoqtaryn qoıdy.
