SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, týlıaremııa – tabıǵı oshaqtary bar, asa qaýipti zoonozdyq ınfeksııa, ıaǵnı ony aýrý janýarlar tasymaldaıdy.
«Bul indet ásirese jaz ben kúzde qozady. Maýsymdyq ınfeksııany tyshqandar, sý egeýquıryqtary, sýyrlar, keneler jáne qan soratyn jándikter taratady. Inkýbasııalyq kezeńniń uzaqtyǵy shamamen 1-20 táýlikti quraıdy, biraq kóbinese – 3-7 táýlik. Ádette aýrý tez bastalady, dene qaltyrap, dene qyzýy kóteriledi, deneniń aýyrsynýy, bas aýrýy, álsizdik paıda bolady», deıdi SQO SEBD asa qaýipti ınfeksııalardy jáne týberkýlezdi epıdemıologııalyq qadaǵalaý bóliminiń basshysy Iýlııa Gaısına.
Mamandardyń aıtýynsha, SQO aýmaǵy alqapty-batpaqty jerde týlıaremııanyń tabıǵı oshaǵynda ornalasqan. Birneshe jyl buryn bul aýrý óńirde keńinen taralǵan eken. Qaýipti ınfeksııany juqtyrǵandar sońǵy ret 5 jyl buryn anyqtalypty.
Aımaqta atalmysh ınfeksııanyń aldyn alý úshin birqatar is-sharalar atqarylatyn bolady.
