Jeńimpazdardy jeńisterimen jáne kásibı merekelerimen quttyqtaǵan Senat Tóraǵasy Máýlen Áshimbaev pandemııa kezinde jýrnalıster men basqa da BAQ qyzmetkeriniń róli asa mańyzdy bolǵanyn atap ótti. Olardyń qajyrly eńbeginiń arqasynda qazaqstandyqtar eldegi ahýaldy, indetpen kúres barysynda qolǵa alynǵan sharalardy, memlekettiń damýy jolynda qabyldanyp jatqan asa mańyzdy zańdardy der kezinde bilip otyrdy.
«Pandemııaǵa jáne qabyldanǵan shekteýlerge baılanysty bıyl ekinshi jyl qatarynan jýrnalıster qıyn jaǵdaıda jumys isteýde. Soǵan qaramastan, sizder kásibı biliktiliktiń bıiginen kórinip, azamattarymyzdy mańyzdy aqparattarmen der kezinde tanystyryp, ózekti máselelerge arnalǵan reportajdar men saraptamalyq materıaldaryńyzdy ýaqtyly jarııalap kelesizder. Osyndaı belsendilikterińiz úshin sizderge alǵysymyzdy bildiremiz», dedi Senat Tóraǵasy.
M.Áshimbaev Memleket basshysy Qazaq radıosynyń 100 jyldyǵyna oraı 1 qazandy resmı túrde «Radıo qyzmetkerleriniń kúni» retinde jarııalaýdy usynǵanyn aıtty.
Bıyl baıqaýǵa 100-ge jýyq jumys kelip tústi. Qatysýshylar arasynda telearna, radıo, gazet, aqparattyq portaldar jáne basqa da BAQ tilshileri bar.
«Baıqaýǵa usynylǵan barlyq materıal – joǵary kásibı deńgeıdegi jumystar. Arnaıy komıssııa olardyń arasynan eń úzdikterin iriktep aldy. Barlyq jeńimpazdy búgingi jeńisterimen quttyqtaımyn», dedi M.Áshimbaev.
Sondaı-aq Senat Tóraǵasy bıyl baıqaýǵa belgili qazaqstandyq jýrnalıster Nurtileý Imanǵalıuly men Mıhaıl Dorofeev atyndaǵy eki júlde qosylǵanyna nazar aýdardy.
«Nurtileý Imanǵalıuly men Mıhaıl Dorofeev – otandyq jýrnalıstıkanyń damýyna úlken úles qosqan qalamgerler edi. Olar talantty jýrnalıst qana emes elimizdiń naǵyz patrıottary boldy. Nurtileý aǵa men Mıhaıl Dorofeevtiń jarqyn beıneleri árqashan bizdiń jadymyzda saqtalady. Olardyń eńbekke degen adaldyǵy, kásibı sheberligi men mol tájirıbesi jas jýrnalıster úshin árdaıym úlgi-ónege bolyp qala beretini sózsiz. Senat taǵaıyndaǵan arnaıy júldeler osy baǵytqa da óz yqpalyn tıgizedi dep senemiz», dedi M.Áshimbaev.
«Amanat» baıqaýynyń bıylǵy jeńimpazdary mynalar:
Úzdik televızııalyq materıal – Indıra Jylqaıdarova («Habar» telearnasy) jáne Svetlana Penkova («Pervyı kanal «Evrazııa»);
Úzdik radıomaterıal – Dýlat Ábıbýllaev («Qazaq radiosy»);
BAQ basylymdaryndaǵy úzdik jarııalanym – «Atyraý» gazetiniń ujymy jáne Oksana Skıban («Lıter» gazeti);
Internet-basylymdaǵy úzdik jarııalanym – Marlan Jıembaı («QazAqparat» HAA) jáne Evgenıı Fedotov (Kazpravda.kz);
Áleýmettik jelilerdegi úzdik jarııalanym – Nartaı Aralbaıuly;
«Táýelsizdikke 30 jyl» – Qazaqstannyń Táýelsizdiginiń 30 jyldyǵy týraly úzdik materıal – Joldybaı Bazarov («Egemen Qazaqstan» gazeti) jáne «Habar 24» telearnasynyń ujymy;
Nurtileý Imanǵalıulyn este qaldyrýǵa arnalǵan «Qazaq jýrnalıstıkasynyń damýyna qosqan úlesi úshin» syılyǵy – Jaına Slambek («Qazaqstan» ulttyq telearnasy);
Mıhaıl Dorofeevti este qaldyrýǵa arnalǵan «Úzdik analıtıkalyq materıal úshin» syılyǵy – Iýrıı Masanov (Kursiv.kz);
Parlamenttik jýrnalıstıkanyń damytýǵa qosqan úlesi úshin arnaıy júlde – Eldar Nýrýllın («Ekspress-K» jańalyqtar portaly).
