Chehııada tornado saldarynan adamdar japa shekti. Memlekettiń ońtústik-shyǵysynda júrip ótken sumdyq daýyl
3 adamnyń ómirin qıyp, júzge jýyq adamnyń densaýlyǵyna zaqym keltirdi.
Jaýyn-shashyn men naızaǵaıdan keıin paıda bolǵan tornado túgel memleketti ábigerge saldy. 7 qala men birqatar aýyldyq eldi mekende úıler men ǵımarattar qulap, jermen-jeksen boldy. Tabıǵı apat saldarynan júzdegen kólik aýdaryldy. 120 myńnan astam úı jaryqsyz qaldy.
Apat saldaryn anyqtaýǵa 360 polısııa qyzmetkeri jumylǵan. Respýblıkanyń basqa taraptarynan qutqarýshylar shaqyrylǵan. Sonymen qatar Aýstrııa men Slovakııa da qosymsha kómek kúshin jiberdi.
Oqıǵa oryndarynda drondar men tikushaqtar júr. О́ıtkeni úıindiler arasynan adamdardy tabý qıynǵa soǵyp jatqan kórinedi. Qutqarýshylardyń biri qaıtys bolǵan. Sondyqtan 3 adam degen naqty ári sońǵy statıstıka emes desedi.
Eldiń premer-mınıstri Andreı Babıs apat úlken shyǵynǵa alyp kelip, memleket úshin aýyr soqqy bolǵanyn málimdedi. Brıýsselge Eýropa odaǵynyń sammıtine qatysýǵa ketken úkimet basshysy bul oqıǵany «qasiret» dep atady.
Hrýskı qalasy ákiminiń orynbasary BAQ-qa arnalǵan máslıhatta ózi basqaryp otyrǵan qaladaǵy barlyq ǵımarattyń qulaǵanyn habarlady. «Shirkeýdiń munarasy, mektepterdiń shatyry joq. Úılerdiń qabyrǵasy túgeldeı qulady. Adamdar japa shekti. Jaǵdaı qıyn», dedi ol.
