Árıne, mundaı mejeden jýrnalıstıkanyń keshegi klassıkalyq mektebinen ótken, jazý-syzýdyń mehnatyn azap dep emes, óner dárejesinde baǵalaıtyn óreli jandar ǵana kórinedi. Sanaly ǵumyrynyń baryn sarǵaıǵan gazet betterine sarp etken sondaı tulǵanyń biri – Qazaqstannyń eńbek sińirgen qaıratkeri, Qazaqstan Respýblıkasy Prezıdentiniń buqaralyq aqparat quraldary salasyndaǵy syılyǵynyń laýreaty, Qazaqstan Jýrnalıster odaǵy syılyǵynyń laýreaty Maǵaýııa Sembaı edi. Oblystyq «Ortalyq Qazaqstan» gazetin shırek ǵasyrǵa jýyq basqarǵan bilikti basshy, talapshyl redaktor, bas basylym «Egemen Qazaqstan» gazetinde de jemisti qyzmet etken pýblısıst Maǵaýııa Slambekulynyń jalpy qazaq baspasóziniń kóshin alǵa uzatýda eńbegi eren desek qatelespegen bolar edik.
Keshegi qazaq jýrnalıstıkasynyń korıfeıi, namystyń narkeskeni atanǵan Nurmahan Orazbekovtiń aldyn kórgen, tálimin alǵan jýrnalıst-qalamger Maǵaýııa ózi de keıin aǵalar salǵan sara joldy dara dańǵylǵa aınaldyra bildi. Keńes Odaǵynyń qylyshynan qan tamyp turǵan qıyn-qystaý kezdiń ózinde «Tamyz búligin» taısaqtamaı birinshi basqan «Ortalyq Qazaqstan» gazetiniń bedeli el ishinde árqashan bıik. «Egemennen» keıingi ekinshi gazet» degen beıresmı ataǵy bar aqıqattyń aldaspany Maǵaýııa Sembaı basqarǵan tusta da tuǵyrynan tómendemedi. Baspasóz bahadúrlerin baptaýda onyń erekshe ustazdyǵy óz aldyna jeke taǵylym. Jalpy, onyń redaktorlyǵy tek mansap mańaıynda ǵana emes, minez minberinde de kórinip turatyn.
Bıyl atalǵan oblystyq gazettiń torqaly toqsan jyldyq toıy. Shirkin, Maǵaýııa Sembaı bul qyzyqty kóre alaı ómirden ozdy... Árıne, ókinishti, biraq sońynda shákirtteri bar ustazdyń «aty da, haty da» eshqashan ólmek emes.
