G.A.Atknın – keste tigý sheberi. Ol úshin shabyttyń negizgi kózi hakas halqynyń qolóneri bolǵan. Kórkem kestelerden basqa sýretshi keskindeme, grafıka jáne músin salasynda da jemisti eńbek etken. Grıgorıı Alekseevıch 1906 jyly 14 qarashada Ýst-Abakanda dúnıege kelgen. 1926 jyly Ombydaǵy Vrýbel atyndaǵy kórkemsýret tehnıkýmyna, keskindeme jáne dekorasııa fakýltetine oqýǵa túsedi. Máskeýde, Abakanda, Tashkentte oqıdy, qyzmet isteıdi. 1962 jyly Almaty qalasyna, otbasymen kóship kelgen jáne dál osy sheberlerdiń qolynan aqyn-jazýshylarymyz J.Jabaev, M.Áýezov, S.Seıfýllın, S.Muqanovtyń portretteri kestelengen eken. Qolóner sheberi, sýretshi G.Atknınniń eń úlken eńbegi – kestemen toqylǵan portret jasaýdy úzdik óner dárejesine kóterýi.
Mýzeıde turǵan Sábeńniń jeke portreti keste (mýlıne) jippen sheber oryndalǵan. 1970 jyly Qazaqstan Jazýshylar odaǵynyń arnaıy tapsyrysymen jasalyp, jazýshynyń 70 jyldyq mereıtoıyna tartý etilgen. Bul týraly: «Ornymnan turyp, qabyrǵada ilýli turǵan sýretterge qaraı bastadym. «Mynaý akvarel, anaý maıly boıaýmen salynǵan.. buryshtaǵy she? Keste ǵoı. Mynaý... bul qandaı sheberdiń qolynan shyqty eken? Qaǵazǵa salǵan sýret te mundaı ádemi bolmas... Sábeńniń dál ózi: ústinde qazaqy túıe jún shekpeni, basynda sýsar bórik, kózin sál qysyńqyrap, qýlana kúlip tur. Kimniń óneri bolsa da, kóz tımesin!» – dep tamsana jazǵan eken ózbek jazýshysy Nasyr Fazylov («Kádimgi Sábıt Muqanov», Estelikter. 1984).
Portretti mýzeıge Sábeńniń 47 jyl otasqan súıikti jary Márııam Qojahmetqyzy 1978 jyly tabystaǵan. Sáti túsip mýzeıge kelýshiler súısine qarap, tamashalaıtyn qundy jádiger.
Janar TAEVA,
«Almaty qalasynyń mýzeıler birlestigine» qarasty S.Muqanov pen
Ǵ.Músirepovtiń ádebı-memorıaldyq mýzeı kesheniniń ǵylymı qyzmetkeri
