Is-sharaǵa Mádenıet jáne sport mınıstri Aqtoty Raıymqulova, vıse-mınıstr Ǵabıdolla Ábdirahymov, kúsh qurylymdary jáne týrıstik bıznes-qoǵamdastyqtyń ókilderi qatysty. Vedomostvo basshysy óziniń alǵy sózinde týrızm salasynyń qazirgi tańdaǵy negizgi mindetteriniń biri – sıfrlandyrý jáne týrısterdiń kelý prosesterin jeńildetýge arnalǵan aqparattyq júıelerdi keńinen engizý ekenin atap ótti.
Al Kazakh Tourism basqarma tóraǵasy Erjan Erkinbaev sheteldik týrısterdi tartý máselelerinde olardyń sanyn ǵana emes, atap aıtqanda, týrıster bizdiń elde qansha kún toqtaıtynyn, qandaı oryndarǵa jıi baratynyn, qandaı qyzmetterdi paıdalanatynyn bilý mańyzdy ekenin aıtty.
«Sheteldik týrısterdiń Qazaqstanda bolǵan kúnder sanyn esepteý úshin qonaqúıde turǵany týraly málimetterdi alý qajet. Biz árbir qonaqúı óz qonaqtarynyń esebin júrgizetinin jáne olarda osyndaı málimetterdiń bar ekenin bilemiz. Mindet – osy derekterdi biryńǵaı taldaý júıesine jınaqtaý», dedi Erjan Erkinbaev.
Joba daıyndaýshylardyń habarlaýynsha, eQonaq júıesi Qazaqstannyń týrıstik salasyn damytýdyń 2019-2025 jyldarǵa arnalǵan memlekettik baǵdarlamasynyń júıeli is-sharasy jáne bastapqyda týrıstik aǵyn statıstıkasyn retteýdi kózdegen bolatyn.
Sondaı-aq ótken jyldyń qańtarynda Prezıdent Qasym-Jomart Toqaev sheteldik týrısterdi mindetti tirkeýden bas tartý kerektigin málimdegen edi. Endi bul fýnksııa ornalastyrý oryndaryna bekitilgen. Al kóshi-qon qyzmetterine aqparat berýdiń odan arǵy prosesterin ońaılatý úshin eQonaq júıesi osy mindetterge saı ıntegrasııalanǵan.
eQonaq júıesin tájirıbe júzinde paıdalanýdy Kazakh Tourism ulttyq kompanııasy 2020 jyldyń IV toqsanynda júzege asyrǵan. Qazirgi ýaqytta júıe Nur-Sultan jáne Almaty qalalarynda, sondaı-aq Aqmola jáne Soltústik Qazaqstan oblystaryndaǵy 383 ornalastyrý ornynda (qonaqúıler, hostelder, demalys úıleri jáne t.b.) 21985 týrısti tirkep, engizgen.
Sonymen qatar júıeni daıyndaýshylar Ashyq júıesimen ıntegrasııalaýdy josparlap otyr.
«О́zderińiz biletindeı, Ashyq júıesiniń arqasynda adamdar kınoteatrlarǵa, dámhanalar men meıramhanalarǵa qaıta kirgize bastady. Ol úshin tek JSN-ińizdi engizip, QR kodty skanerleý qajet. Alaıda sheteldikter JSN-siz qazaqstandyq júıeni paıdalana almaıdy, júıede sheteldikter týraly derekter joq. Bul derekterdi biz eQonaq júıesi arqyly ala alamyz. Bul týrısterge el ishinde qaýip-qatersiz júrýge múmkindik beredi, sonymen qatar biz úshin týrıster toqtaǵan jerlerge ǵana emes, sonymen birge olar ornalasqan jerlerge de qosymsha málimetter qosady. Bul týrızm salasyndaǵy ınfraqurylymdy josparlaý kezinde de kómektesedi, óıtkeni biz týrıster legin kóremiz», dep málimdedi Erjan Erkinbaev.
Osy jyldyń maýsym aıynda Alakól, Balqash, Atyraý jáne Aqtaý qonaqúılerine eQonaq júıesi kezeń-kezeńimen engizildi. Jyl sońyna deıin elimizdiń basqa da týrıstik aımaqtaryn qamtý jáne eQonaq júıesi bar qonaqúıler sanyn 600-ge deıin jetkizý josparlanyp otyr.
