«Closing the Gender Gap» akseleratory áıelderdiń jetekshi laýazymdarǵa kóterilýine jaqsy múmkindikter qurýǵa jáne tez damyp kele jatqan sektorlarǵa qaıta jumysqa ornalasý maqsatynda oqytý arqyly jumys kúshiniń qatysýyn arttyrýǵa baǵyttalǵan. Yntymaqtastyq modeli bolashaq urpaqtar úshin genderlik teńdikti jedeldetý maqsatynda memlekettik jáne jeke sektor basshylaryn biriktiredi. Qazaqstan Ortalyq Azııa elderinińarasynda akseleratorǵa qosylǵan eń alǵashqy memleket boldy. Qazaqstannyń memlekettik organdary, Dúnıejúzilik ekonomıkalyq forým (DEF) jáne «Astana halyqaralyq qarjy ortalyǵy» (AHQO) nıet hatyna qol qoıdy.
Sessııaǵa DEF pen Qazaqstan ókilderi qatysty, onyń ishinde Anar Omarova - AHQO Basqarýshysynyń aǵa keńesshisi; Saadııa Zahıdı - Dúnıejúzilik ekonomıkalyq forýmnyń basqarýshy dırektory; Doktor Ranııa A. Al-Mashat - Egıpet Arab Respýblıkasynyń Halyqaralyq yntymaqtastyq mınıstri; Lazzat Ramazanova - Qazaqstan Respýblıkasy Parlamenti Májilisiniń depýtaty, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy.
Sessııa barysynda AHQO DEF-na ulttyq deńgeıdegi bastamany qurǵany úshin, ártúrli elderdegi genderlik tepe-teńdikti saqtaýǵa jáne áıelderdiń bilimine, damýyna jáne kásibı ósýine qosqan úlesi úshin, sondaı-aq, áıelderdiń quqyqtary men múmkindikterin jaqsartý tájirıbelerin engizgeni úshin Arnaıy marapatyn tabys etti.
Saadııa Zahıdı, Dúnıejúzilik ekonomıkalyq forýmnyń basqarýshy dırektory:
«Dúnıejúzilik ekonomıkalyq forým atynan men AHQO-nyń Arnaıy marapatyna ıe bolǵanymyz úshin shyn júrekten alǵysymyzdy bildirgim keledi. Genderlik teńdikke qol jetkizý jumys ornynda, bilim berý júıesinde jáne úı sharýashylyǵynda óte mańyzdy mindet bolyp qala beredi, jáne biz osy maqsatqa jetýge umtylamyz. Bul qıyndyqtardy sheshý qıyn bolǵanymen, úkimet pen bıznes kóshbasshylary arasyndaǵy yntymaqtastyq arqyly biz júıeli jáne turaqty progreske qol jetkize alamyz. Biz Qazaqstandaǵy akseleratordy iske qosý arqyly ekonomıkalyq saladaǵy genderlik alshaqtyqty joıý jolyndaǵy seriktestigimizdi asyǵa kútemiz».
AHQO úılestirýshi rólinde jeke jáne kvazımemlekettik kompanııalardy akselerator baǵdarlamasyna qosylýǵa shaqyrdy. Aıta ketsek, bul jeke jáne memlekettik sektorlardyń birlesken iri jobalarynyń biri: akseleratorǵa qatysýǵa 50-den astam kompanııa shaqyryldy.
Lazzat Ramazanova, Qazaqstan Respýblıkasy Parlamenti Májilisiniń depýtaty, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy:
«Bizdiń genderlik teńdikke qol jetkizý jáne áıelderdiń múmkindikterin keńeıtý jónindegi kózqarasymyz «Closing the Gender Gap» akseleratorynyń maqsattaryna tolyq sáıkes keledi.
Men jeke sektordaǵy kompanııalardy osyndaı jahandyq bastamaǵa qatysýǵa, osy máseleni jaqsartý boıynsha óz pikirlerimen bólisýge, sondaı-aq Qazaqstanda jáne búkil álemde genderlik teńdikke qol jetkizýge úles qosýǵa shaqyramyn».
Anar Omarova, AHQO Basqarýshysynyń aǵa keńesshisi:
«AHQO akseleratorǵa áıelderdiń ekonomıkalyq múmkindikterin keńeıtý maqsatynda belsendi sharalar qabyldaý úshin memlekettik-jekemenshik yntymaqtastyqty damytýǵa jaýapty ulttyq úılestirýshi retinde qosyldy. Budan ári qaraı biz kvazımemlekettik jáne jeke sektorlarmen birge jergilikti deńgeıde tereń taldaý men baǵalaýdy júrgizetin bolamyz, jáne ár túrli saladaǵy jáne deńgeıdegi áıelderdiń ekonomıkalyq múmkindikterin keńeıtý maqsatynda negizgi mindetter men kórsetkishteri bar is-sharalar josparyn daıyndaımyz».
D-r Ranııa A. Al-Mashat, Egıpet Arab Respýblıkasynyń Halyqaralyq yntymaqtastyq mınıstri:
«Mysyrdyń «Closing the Gender Gap» akseleratoryna qosylýy Mysyr úkimetiniń genderlik kún tártibin iske asyrýǵa jáne mysyrlyq áıelderge múmkindikterin keńeıtý úshin qajetti saıasat pen qurylymdyq reformalardy júrgizýge degen saıası erik-jigeri men ekonomıkalyq mindettemelerin kórsetedi. Áıelderdiń ekonomıkaǵa qatysýy makrodeńgeıde sheshýshi mánge ıe boldy. Halyqaralyq Valıýta qorynyń baǵalaýy boıynsha, áıelderdiń Egıpet ekonomıkasyna teń ıntegrasııasy onyń JIО́-ne tikeleı áser etip, ony shamamen 34 paıyzǵa arttyrady. Osylaısha, akseleratordyń is-sharalar josparynda memlekettik jáne jeke sektorlardyń árbir qatysýshysy úshin jergilikti deńgeıde máseleni túsinýdi arttyrý, qajettilikterge negizdelgen iske asyrý josparyn jasaý jáne olardyń oryndalýyn yntalandyrý sekildi tapsyrmalar belgilengen».
