Parlament Májilisiniń depýtattary sessııa aralyq kezeńde saılaýshylarmen kezdesýler ótkizip, partııanyń saılaýaldy baǵdarlamasyn iske asyrýǵa arnalǵan jol kartasynyń oryndalýyn qadaǵalady.
Qala ákimi M.Áıtenov Parlament depýtattary Qazaqstan damýynyń strategııalyq baǵdarlamalaryn, Memleket basshysynyń saıası reformalaryn júzege asyrýdy qamtamasyz etetin zań normalarynyń qabyldanýyna úlken úles qosyp otyrǵanyn aıta otyryp, olardyń qyzmetine qala turǵyndary atynan alǵysyn bildirdi. Bul zań normalary qoǵamdaǵy ózekti máselelerdi sheshýge, árbir azamatty áleýmettik jaǵynan qorǵaýǵa, qazaqstandyqtardyń ómir sapasyn jaqsartýǵa yqpal etetinin aıtty.
«Nur Otan» partııasynyń Parlamenttegi fraksııa músheleri partııanyń saılaýaldy baǵdarlamasyn júıeli túrde iske asyrýǵa jumylyp otyrǵandyǵyn aıta otyryp, osy baǵdarlama negizinde jasalǵan jol kartasy árbir óńirdiń ózekti máselelerin naqty sheshýge qyzmet etetinine nazar aýdardy.
«Nur Otan» partııasynyń Shymkent qalalyq fılıaly da partııanyń saılaýaldy baǵdarlamasynyń negizinde qalanyń damýyna yqpal etetin máseleler boıynsha jol kartasy qabyldanǵanyn, olardy tabysty iske asyrýǵa memleket qarjysynyń bólinýine Parlament depýtattary qoldaý kórsetip otyrǵanyn jetkizdi.
Qala basshysy óz sózinde partııa fılıalynyń naqty is-qımylyn aıqyndaıtyn bul qujat qalanyń tutastaı damýyna serpin beretinin aıta otyryp, alǵa qoıǵan maqsattardyń oryndalýyna qoǵamdyq baqylaý júrgizýge partııa músheleri belsendi túrde qatysýy kerek dedi.
Aıta ketsek, Qazaqstan Respýblıkasy Parlamenti Májilisiniń VII shaqyrylymdaǵy I sessııasynyń jumysy 30 maýsym kúni aıaqtalǵan bolatyn. Sessııa barysynda Parlament Májilisiniń depýtattary 100-den asa zań jobalaryn qarap, 63 zań jobasy Memleket basshysyna qol qoıýǵa usynylǵan.
Qalyptasqan saıası dástúr boıynsha Parlament depýtattary ózderi saılanǵan óńirlerge, shalǵaıdaǵy aýyldyq jerlerge baryp, partııanyń saılaýaldy baǵdarlamasynyń oryndalýy jóninde saılaýshylarmen kezdesýler ótkizedi. Halyqpen tikeleı ótetin kezdesýlerdiń belgilengen formaty eldegi epıdahýalǵa baılanysty ózgerip, basymdyq qurylys alańdarynda, eńbek ujymdarynda, ózekti máseleler sanatyndaǵy obektilerde shaǵyn ǵana toptarmen ótetin kezdesýlerge berilip otyr.
