Baýyr eti balasyna alıment tóleýden bas tartyp, bas saýǵalap júrgen ondaǵan boryshker tabyldy. Shyn máninde izdeýde júrgenderdiń sany óte kóp. Taýyp alý da ońaı-ospaq sharýa emes. Bul arada adamnyń jeke ar-ojdany ǵana paryzdy oryndaýǵa túrtki bolatyn tárizdi. Qymbatshylyq qos búıirden qysyp turǵan kezde jetimdi jaýtańdatpaı, jan jylýyn tógý adamshylyqtyń belgisi emes pe?!
– Atqarylyp jatqan jumys az emes. 40-tan astam kókek ákege aıyppul salyndy, 45 boryshker ákimshilik jaýapkershilikke tartylyp, qamaýǵa alyndy. Jumyspen qamtý bólimimen birlese jumys isteýdemiz. Boryshkerlerdi jumysqa ornalastyrý maqsatynda bos oryndar jármeńkesi turaqty ótkizilip turady, – deıdi jeke sot oryndaýshysy Qanat Hafızov. – Taıaýda ǵana birneshe adamdy turaqty jumysqa ornalastyrdyq.
Sot oryndaýshysynyń aıtýyna qaraǵanda, boryshkerlerdiń basym bóligi turaqty tabys kóziniń joqtyǵyn jeleý etedi eken. Áıtse de jumys isteýge yntalarynyń bolmaýy máseleni tuıyqqa tirep tur. Keıbireýler ýaqytsha jumys istegenimen, resmı tirkelmeıdi. Ondaǵy oılary – tabystaryn jasyrý.
Kúni búginge deıin qolǵa alǵan qat-qabat sharýalardyń nátıjesinde jyl basyndaǵy 657 mln teńge qaryz 302 mln teńgege qysqarǵan. Bul oraıda úgit-nasıhattan góri naqty is-qımyl septigin kóp tıgizýde. Tyǵyryqtan shyǵar jol izdegen sot oryndaýshylary men jumyspen qamtý ortalyqtary elýge jýyq boryshkerdi turaqty jumysqa ornalastyryp, jalaqylarynan balalaryna tólenýge tıisti qarajat ustalýda. Osylaı bola tura, mamandar sońǵy jyldary alıment tólemeı jaltaratyndardyń sany kóbeıip bara jatqandyǵyn aıtyp alańdap otyr.
Jyl basynan beri qalalyq, aýdandyq bólimderge alımentten jaltarýshylarǵa izdeý salý týraly alpystan astam qaýly túsipti. Izdestirý nátıjesinde úsh kúnniń ishinde 12 adamnyń turaqty mekenjaıy anyqtalǵan. Mamandardyń aıtýlaryna qaraǵanda, qıyndyq keıbir boryshkerlerdiń el aýmaǵynan kóship ketkendiginde bolyp otyr. Tıimdi ádis – boryshkerlerdiń jeke kóligin aıyppul turaǵyna qoıý. Alıment tóleýge qaýqarymyz joq dep ant sý ishetinder qymbat kólikterinen aıyrylý qaýpi tóngennnen keıin lezde qaryzdaryn óteýge qarajat tabatyn kórinedi. Jyl basynan beri bereshek qaryzdary 20 mln teńgeden asyp ketken 15 boryshkerdiń «temir tulpary» alyp qoıylǵan soń alıment úshin tóleıtin bereshekterin birer kúnniń ishinde taýyp tólegen.
Osyǵan qaraǵanda, kókek ákelerge baýyr eti balanyń jaýtańdaǵan jaıynan kóliktiń qymbat bolǵany ǵoı...
KО́KShETAÝ
