Senat Spıkeri sońǵy jyldarda áleýmettik kásipkerliktiń ekonomıkalyq damýdaǵy róli artyp, memleket tarapynan bul salany jetildirýge erekshe kóńil bólinip jatqanyn aıtty.
«Áleýmettik kásipkerlik – elimizdegi jańa baǵyttardyń biri. Onyń bolashaǵy zor. Bul sala tabys tabýmen qatar, azamattardyń ózekti áleýmettik máselelerin sheshýge múmkindik beredi. Sondyqtan Prezıdentimiz Qasym-Jomart Kemeluly Toqaev kásipkerliktiń bul túrine basa mán berip keledi», dedi Máýlen Áshimbaev.
Sondaı-aq ol Memleket basshysynyń tapsyrmasy boıynsha áleýmettik kásipkerlikti damytýdy kózdeıtin zań ázirlenip, qabyldanǵanyn tilge tıek etti. Aıta ketsek, atalǵan qujat senatorlardyń bastamasymen daıarlanǵan.
«Bul zańda alǵash ret áleýmettik kásipkerlikke zańnamalyq turǵydan túsinik berilgen. Osy zań arqyly áleýmettik kásipkerlerdi qoldaýǵa arnalǵan naqty sharalar da anyqtaldy. Atap aıtqanda, salyqtyq jeńildikter men nesıeniń ústeme aqysyn sýbsıdııalaý jáne jaldaý qunyn tóleý sııaqty qarjylaı qoldaýlar qarastyrylǵan. Memleket menshigindegi ǵımarattardy jeńildikpen jalǵa berý múmkindigi de nazarǵa alyndy. Odan bólek, memleket tarapynan áleýmettik mańyzy bar jobalardy iske asyrý úshin granttar bólinetin bolady», dep túsindirdi Senat Tóraǵasy.
Sapar barysynda Senat Spıkeri agrarlyq baǵytta tabysty jumys istep kele jatqan kóp salaly «Baıserke-Agro» kompanııasynyń jumysymen tanysty.
Sharýashylyqqa arnaıy kelgen Máýlen Áshimbaev kompanııanyń Ǵylymı-óndiristik oqytý ortalyǵyna at basyn buryp, zertteý jumystaryna erekshe nazar aýdardy. Agroholdıngtiń demonstrasııalyq alqaby men aýylsharýashylyq tehnıkalarynyń jumysyna da kóńil bóldi. Odan bólek, Senat Tóraǵasy agroónerkásip kesheniniń ǵylymı jáne tehnıkalyq jetistikter kórmesimen, seleksııalyq jolmen asyl tuqymdy mal alý jumystarymen jáne sút, jylqy ónimderin alýdyń robottandyrylǵan tásilimen tanysty.
«Prezıdentimizdiń bastamashy bolýymen jer qatynastaryna qatysty arnaıy zań jobasy ázirlenip, qabyldandy. Soǵan sáıkes aýyl sharýashylyǵy maqsatyndaǵy jerlerdi sheteldikterge satýǵa jáne jalǵa berýge birjola núkte qoıyldy. Sondaı-aq Memleket basshysynyń tapsyrmasymen Jer reformasy jónindegi komıssııa qurylyp, tabysty jumys istep jatyr. Komıssııanyń usynystary nátıjesinde aýylsharýashylyq jerlerin jekemenshikke berýge moratorıı uzartyldy. Aýyl sharýashylyǵy maqsatyndaǵy jerlerdi jalǵa alý quqyǵyn satýǵa múmkindik berildi. Bul norma aýylsharýashylyq jerlerin naryqtyq aınalymǵa engizýge múmkindik beredi», dedi Máýlen Áshimbaev.
Eldi alańdatyp otyrǵan qýańshylyq pen mal shyǵyny máselesi de nazardan tys qalmady.
«Memleket basshysy Reformalar jónindegi joǵary keńestiń sońǵy otyrysynda mal sharýashylyǵyna aıtarlyqtaı saldaryn tıgizip otyrǵan qýańshylyq máselesine nazar aýdardy. Qazirgi tańda bul – búkil eldi alańdatyp otyrǵan problema. Sondyqtan tıisti Mınıstrlik osy máseleni sheshý úshin bar kúsh-jigerin jumsaýy kerek. Bul jolda júıeli qadamdar qajet. Aýyl sharýashylyǵy mınıstrligi jedel túrde ahýaldyń saldaryn taldap, jaǵdaıdy jan-jaqty saraptap, máseleni sheshý joldaryn usynýǵa tıis», dep tolyqtyrdy Senat Tóraǵasy.
Senat Spıkeri kezdesýge qatysqan Aýyl sharýashylyǵy vıse-mınıstrine bul baǵytta belsendilik tanytý kerektigin aıtty.
