Infeksııalyq jáne parazıttik aýrýlardyń paıda bolýy men taralýynyń aldyn alý maqsatynda Densaýlyq týraly kodekste kózdelgen sanıtarlyq-epıdemııaǵa qarsy is-sharalardyń biri – profılaktıkalyq ekpeler.
Medısınalyq qarsy kórsetilimderi joq, Qazaqstan Respýblıkasy aýmaǵynda turaqty turatyn jeke tulǵalar ınfeksııalyq jáne parazıttik aýrýlarǵa qarsy ekpelerdi alýǵa mindetti (Kodekstiń 85-babynyń 4 jáne 8-tarmaqtary), olardyń qataryna KVI-ǵa qarsy profılaktıkalyq ekpe de jatady (Qazaqstan Respýblıkasy Úkimetiniń 2020 jylǵy 24 qyrkúıektegi № 612 qaýlysyna sáıkes).
Osylaısha, medısınalyq qarsy kórsetilimderi joq adamdar úshin KVI-ǵa qarsy mindetti vaksınalaýdyń quqyqtyq negizderi bar jáne bul «Memleket adamnyń ómir súrýi men densaýlyǵyna qolaıly aınaladaǵy ortany qorǵaýdy maqsat etip qoıady» degen konstıtýsııalyq normaǵa sáıkes keledi (Konstıtýsııanyń 31-baby).
Adamnyń jáne azamattyń quqyqtary men bostandyqtaryna kepildik bere otyryp, QR Konstıtýsııasy mundaı shekteýdiń jol beriletin shekterin belgileı otyryp, olardy shekteý múmkindigin joqqa shyǵarmaıdy. Adamnyń quqyqtary men bostandyqtaryn jáne halyqtyń densaýlyǵyn qorǵaý maqsatynda ǵana quqyqtar men bostandyqtar shektelýi múmkin (Konstıtýsııanyń 39-babynyń 1-tarmaǵy).
«Egemen-aqparat»
