«Qaırat» Chempıondar lıgasynyń alǵashqy irikteý kezeńinde Haıfanyń «Makkabıimen» syrt alańda kezdesti. «Sammı Ofer» stadıonynda ótken oıyn 1:1 esebimen teń aıaqtaldy. Almatylyq ujymnyń Eýrokýbok jarystaryndaǵy statıstıkalyq nátıjelerine kóz júgirter bolsaq, «Qaırat» birinshi irikteý kezeńderin óte sátti bastaǵanymen, kóbine syrt alańdaǵy oıyndarda teń túsip jatady. Mine, keshegi oıynda da jeńilip jatyp esepti teńestirip ketti.
Jalpy «Qaırat» Eýrododa básekelerinde Izraıl klýbtarymen jıi kezdesedi. Byltyrǵy el chempıony Haıfanyń «Makkabıimen» bıyl qatarynan ekinshi jyl oınap jatyr. Almatynyń komandasy byltyr Izraıl klýbymen Eýropa lıgasynyń birinshi irikteý kezeńinde jolyqsa, bıyl eki ujym Chempıondar lıgasynyń alǵashqy kezeńinde kezdesti.
Bir ókinishtisi, «Qaırat» Izraıl komandalarymen únemi Eýrokýbok týrnıriniń ekinshi kezeńinde jolyǵyp, jarysty sol jerden aıaqtaıtyn sátsiz statıstıkasy bar. Máselen, Almaty klýbynyń Izraıl komandalarymen tanystyǵy 2016/17 jylǵy Eýropa lıgasynda bastaldy. Sol jyly týrnırdiń ekinshi irikteý kezeńinde Tel-Avıvtiń «Makkabıimen» kezdesken qazaqstandyq ujym eki oıyn qorytyndysy boıynsha 3:1 (1:1, 1:2) esebimen jeńilip, jarystan shyǵyp qaldy. Araǵa úsh jyl salyp «Qaırat» Eýropa lıgasynyń ekinshi irikteý kezeńinde Izraıldiń taǵy bir komandasymen oınap, Eýrokýbok básekesindegi joryǵyn merziminen buryn aıaqtady. Jerlesterimiz bul joly Beer-Shevanyń «Hapoel» ujymynan óte almady. Eki match qorytyndysy boıynsha «Qaırat» 3:1 (1:1, 0:2) esebimen ese jiberdi. Al 2020-2021 jylǵy Eýropa lıgasynyń ekinshi kezeńinde taǵy da «Makkabımen» oınap, syrt alańda ótken kezdesýde 2:1 esebimen utylyp, jarysty aıaqtaýǵa májbúr boldy.
Bir qýanarlyǵy, «Qaırat» bıyl Izraıl komandasymen Eýropa lıgasynda emes, Chempıondar lıgasynda jáne ekinshi emes, birinshi irikteý kezeńinde jolyǵyp tur. Eýropa lıgasyndaǵy sátsizdik bul týrnırde qaıtalanbaıdy degen úmittemiz. Onyń ústine almatylyq ujym syrt alańda ótken birinshi oıynda teń tústi. Bul – qarymta oıynyn óz alańynda ótkizetin klýbqa aıtarlyqtaı basymdyq beredi.
Bıylǵy «Makkabı» – «Qaırat» arasyndaǵy oıynǵa toqtalar bolsaq, jerlesterimiz «á» degennen-aq oıyn tizginin óz qoldaryna alýǵa tyrysty. Tipti 30 myńǵa jýyq jankúıerdiń qoldaýyna ıe bolǵan alań ıelerine qaraǵanda alǵashqy qaýipti shabýyldy da almatylyq ujym uıymdastyrdy. 8-mınýtta Vagner Lavtyń tepken doby qaqpadan asyp ketse, 11-mınýtta Aıbol Ábikenniń jasaǵan soqqysyn «Makkabı» qaqpashysy qaıtara bildi. Degenmen, alań ıeleri birinshi taım aıaqtalar tusta gol soǵyp, esepti ashty. Omer Asılı «Qaırattyń» eki qorǵaýshysynan aýla klýbynyń oıynshysyn aldaǵandaı ońaı sytylyp shyǵyp, Stas Pokatılovty qapy qaldyrdy – 1:0.
Ekinshi taımdy da «Qaırat» oıynshylary belsendi bastady. 55-mınýtta taǵy sol Vagner gol soǵatyn tamasha múmkindikti tıimdi paıdalana almady. Biraq kóp ótpeı jerlesterimiz tarazy basyn teńestirip ketti. Oıynnyń 76-mınýtynda buryshtamadan asyrylǵan dopqa qazaqstandyq qorǵaýshy Nuráli Álip birinshi jetip, baspen gol soqty. Esep – 1:1.
Oıyn aıaqtalǵan soń alań qojaıyndarynyń bas bapkeri Barak Bahar matchqa qatysty pikir bildirdi. «Qarsylasymyz bul matchqa babynda kelgeni baıqalyp tur. Jalpy oıyn tablodaǵy kórsetkishke saı, teń dárejede ótti. Endi kelesi aınalymǵa shyǵý úshin Almatyda qalaı da jeńiske jetýimiz kerek. Bizge alǵashqy match óz babymyzǵa kelip alý úshin jaqsy múmkindik boldy. Endi oıynymyzdy jaqsartýymyz kerek», dedi Bahar matchtan keıin.
Endi eki ujym araǵa apta salyp 14 shildede Almatyda jolyǵady. «Qaırat» klýbynyń baspasóz qyzmeti taratqan aqparat boıynsha, Ortalyq stadıondaǵy match 50 paıyz jankúıerlerdiń qoldaýymen ótpek. Eger almatylyq klýb óz alańynda ótetin oıynda jeńiske jeter bolsa, kelesi kezeńde Serbııanyń «Srvena Zvezdasymen» kezdesedi.
Taǵy bir aıta keterligi,
bıyldan bastap Eýrododa básekelerinde syrt alańda soǵylǵan goldyń mańyzdylyǵy joıyldy. Endi tek eki oıyn nátıjesi boıynsha ǵana úzdik atanǵan klýb kelesi kezeńge joldama alady. Eger komandalar teń túsip jatsa, qosymsha 15 mınýttan eki taım oınaıdy. Qosymsha ýaqytta da jeńimpaz komanda anyqtalmasa, onda penaltı serııasyna júginedi.
