Ábilhan Qasteev atyndaǵy memlekettik mýzeı - elimizdiń biregeı mádenı nysany. Murajaıda 25 myńnan astam eksponat saqtalǵan. Tek ótken aptadan bastap murajaı qyzmetkerleri qyzmetin burynǵydaı oryndaı almaýda. 45 jyl turǵan tarıhı nysannyń janynda jańadan salynǵan turǵyn úı kesheniniń turǵyndary murajaıdyń shýly kondısıonerlerine shaǵymdandy. Nátıjesinde sanepıdemıologtar ǵımaratqa 670 myń teńge kóleminde aıyppul salyp, 30 kún ishinde shýdyń joıylý kerektigi týraly habarlama qaldyrdy.
Murajaı qyzmetkerleri bolsa mýzeıdiń shuǵyl qajettilikteri kondısıonerlerdiń jumysyna muqtaj ekenin aıtady.
«Bul kez kelgen murajaıdyń mindetti sharty, óıtkeni murajaı bólmeleriniń temperatýrasy 18-20 gradýs bolýy kerek. Bólme ylǵaldyǵy men gradýsy belgilengen gradýstan tómen nemese joǵary bolmaýy kerek. Bul sharalar saqtalmasa, eksponattar zaqymdana bastaıdy. Biz bul baǵaly mádenı eskertkishterdiń zaqymdanýyna jol bere almaımyz», dep túsindirdi Qasteev murajaıy dırektorynyń ǵylymı jumystar jónindegi orynbasary Svetlana Kóbjanova.
Murajaı qyzmetkerleri jańa úı salynǵanǵa deıin qurylysqa qarsy bolǵanyn aıtady. Qalalyq josparlaý jáne ýrbanıstıka basqarmasy turǵyn úı kesheni barlyq talaptarǵa saı salynǵanyn málimdedi.
Murajaı qyzmetkerleri jumysyn qalaı jalǵastyraryn bilmeıdi. Kondısıonerler óshirilse, ondaǵan myń eksponattar qaýip-qaterge ushyrap, qundylyǵynan aıyrylady.
