E.Qarashókeev Mańǵystaý oblysyndaǵy qatty qurǵaqshylyqtan zardap shekken agrarshylarǵa kómek kórsetý úshin Úkimet pen aýyl sharýashylyǵy mınıstrligi qabyldap jatqan jedel sharalar týraly habarlady. Atap aıtqanda, 12 shildede Úkimet rezervinen aýyl sharýashylyǵy janýarlarynyń qystaýy úshin azyq qunyn arzandatýǵa 1,9 mlrd teńge bólingen. Ol úı jáne sharýa qojalyqtarynyń ıelerine beriledi.
Azyq-túlik korporasııasy arqyly Mańǵystaý oblysy úshin quny naryqtyq baǵadan 17%-ǵa tómen 637 tonna arpa satyldy. Onyń ishinde 211 tonnasy úı sharýashylyqtaryna satyldy. Kelesi aptada qosymsha 573 tonna arpa jetkiziletin bolady.
Kezdesý barysynda orman sharýashylyǵy, rezervattar aýmaqtarynda mal jaıý jáne shóp shabý máselesi de pysyqtaldy.
Elden azyq shyǵarýǵa tyıym salý boıynsha sharalar qabyldanatyn bolady. Jemshóp daıyndaý úshin arzandatylǵan JJM kólemderin qaıta bólý máselesi de qosymsha qarastyrylýda.
«Azyq-túlikpen qamtamasyz etý jáne jedel áreket etý máselelerin sheshýdi úılestirý úshin, AShM janynan Respýblıkalyq jedel shtab quryldy. Onyń quramyna oblys, aýdan ákimderiniń orynbasarlary, «Báıterek» holdıngi men Azyq-túlik korporasııasynyń qarjylandyrýshy uıymdarynyń basshylary kirdi. Oblys ákimdikteri aldaǵy qystaýǵa arnalǵan jem daıyndaý josparyn aıqyndap, olardy oryndaý boıynsha apta saıynǵy monıtorıngtik jumystardy uıymdastyrdy», dedi mınıstrdiń mindetin atqarýshy.
Sapar sońynda E.Qarashókeev oblys ákimi Serikbaı Trumovpen kezdesip, óńirdiń aýyl sharýashylyǵyn damytý máseleleri jónindegi keńeske qatysty. О́ńirdegi sharýashylyqty jem-shóppen qamtamasyz etý jónindegi júıeli sheshimderdi iske asyrýdy, jemshópti forvardtyq satyp alý jáne jemshóp qunyn arzandatý úshin jergilikti bıýdjetterden qosymsha qarajat qarastyrýdy, sondaı-aq iri munaı jáne qurylys kompanııalarynyń tehnıkasyn Batys Qazaqstan jáne Aqtóbe oblystarynan azyq jetkizýge jumyldyrýdy usyndy.
Mal sharýashylyǵyn qoldaý úshin, óńirde fermerlerdiń kredıt boıynsha tólemderin uzartý máselesi qaralatyn bolady.
«Ákimdikpen birlesip jem-shóp óndirisin damytý jáne jaıylymdardy jaqsartý boıynsha júıeli sharalar qabyldaıtyn bolamyz. Munda barlyq ıesiz jatqan qudyqtar men uńǵymalardy túgendeý, sý bógetterin salý jáne ǵalymdarmen birlese otyryp qurǵaq daqyldardy ósirý qajet. Eń bastysy, synı jaǵdaılar týyndaǵan kezde ýaqtyly sheshim qabyldaý kerek, óıtkeni bul táýekelder boljanyp otyr», dedi E.Qarashókeev.
Sondaı-aq ol aýyl sharýashylyǵy mınıstrligi árdaıym ashyq ekenin jáne óńirlerdiń usynysyn Úkimet deńgeıine qaraýǵa shyǵarýǵa daıyn ekenin aıtty.
