Bul týraly Almaty qalasynyń Týrızm basqarmasy basshysynyń orynbasary Marlen Maralov О́ńirlik kommýnıkasııalar qyzmetinde ótken brıfıngte málimdedi.
Sondaı-aq bıyl taý týrısteriniń sany 4 esege artqanyn aıtty. Osyǵan baılanysty ákimdik Almaty turǵyndary men qonaqtarynyń qaýipsiz ári jaıly demalýy úshin qajetti jaǵdaılar jasaý josparyn ázirledi. Taýly marshrýttardyń shalǵaı toraptyq ýchaskelerinde jazdyń sońyna deıin týrıster panalaý úshin 15 úıshik salynady.
Árbir úıshikte izdestirý, qutqarý qyzmetteri úshin kartaǵa jáne GPS-koordınattarǵa baılanǵan reperlik bastyrma da bolady. Tótenshe jaǵdaılar týyndaǵan kezde nemese aýa raıynyń qıyn bolýyna baılanysty úıshik týrıster kútip, qajetti kómek jıyntyǵyn alýǵa múmkindik beredi (alǵashqy medısınalyq kómek jınaǵy, marshrýt kartalary, mobıldi qurylǵylardy zarıadtaý stansasy, jyly kórpe men buzylmaıtyn azyq-túlik jıyntyǵy).
Úıshiktiń janyna SOS spýtnıktik sıgnalyn qutqarýshylar pýltine engizý júıesi bar dińgekter ornatylady. Dińgekter shuǵyl áreket etý qyzmetterine qashyqtan qosylady (TJD/112).
Apat sıgnalyn berýge arnalǵan barlyq spýtnıktik jabdyqtar taýdaǵy úıshik konstrýksııasyna biriktiriledi, sondaı-aq machtalar Wi-Fi fýnksııasymen jabdyqtalady. Bul júıe shalǵaı taýly marshrýttarda qıyn jaǵdaıǵa tap bolǵan tájirıbesiz, daıyn emes týrısterge arnalǵan. Paıdalanýshy ınterfeısi mınımaldy-daýystyq qońyraý túımesi, beıne qońyraý kamerasy men birneshe tildegi nusqaýlar bolady.
Qosymsha týrıstik navıgasııanyń biryńǵaı júıesin qurý men taýǵa shyǵýǵa arnalǵan smart-navıgator túrindegi qosymshany iske qosý boıynsha jumys júrgiziledi. Ol TJD bazasymen ıntegrasııalanatyn bolady.
Bıyl Kishi jáne Úlken Almaty shatqaldarynda 2 baqylaý-qutqarý pýnkti salynady. Sondaı-aq alǵash ret qurylǵan 16 adamnan turatyn taý qutqarýshylarynyń jasaǵy táýlik boıy kezekshilik etedi. «Tuıyqsý» shatqalynda qosymsha tikushaq alańy qurylady.
