Syrt alańdaǵy oıynda almatylyqtar 1:1 esebimen teń túsip, elge jaqsy kóńil kúımen oralǵan-dy. Araǵa apta salyp Almatydaǵy Ortalyq stadıonda ótken qarymta kezdesýde byltyrǵy el chempıondary Izraılden kelgen qarsylastarynyń qaqpasyna jaýapsyz eki gol salyp, «Makkabıdi» aqyry tize búktirdi. Sóıtip almatylyq ujym Haıfa komandasynan byltyrǵy esesin qaıtardy. Esterińizde bolsa, «Qaırat» Eýropa lıgasynyń byltyrǵy maýsymynda dál osy «Makkabımen» kezdesip, 2:1 esebimen jeńilip qalǵan bolatyn. Jalpy, «Qaırattyń» Izraıl komandalarymen kezdesse, jeńile beretin sátsiz statıstıkasy bar edi. Máselen, buǵan deıingi Eýrokýbok básekelerinde atalǵan eldiń komandasymen úsh márte jolyǵyp, úsheýinde de qarsylastaryna jol bergen edi. Osylaısha «Qaırattyń» Eýropa lıgasyndaǵy sátsizdigi Chempıondar lıgasyna kelgende toqtady.
Almatynyń Ortalyq stadıonyndaǵy qarymta kezdesýdiń alǵashqy mınýttarynda Haıfadan kelgen qonaqtar belsendilik tanytyp, oıyn tizginin óz qoldaryna alýǵa tyrysty. О́ıtkeni jarys erejesi boıynsha kelesi kezeńge tek jeńimpaz komanda ǵana ótedi. Sondyqtan «Makkabı» meılinshe oıyn taǵdyryn negizgi ýaqytta sheship tastaýdy kózdegen edi. Oıyndaǵy alǵashqy qaýipti shabýyldy da Izraılden kelgen fýtbolshylar jasady. 8-mınýtta Omer Asılı áriptesiniń áýelete asyrǵan pasyna birinshi jetip, Stas Pokatılov qorǵaǵan qaqpaǵa baspen joıqyn soqqy jasady. Abyroı bolǵanda dop qaqpa baǵanynan sál joǵary ushyp, esep ózgerissiz qaldy. Arada eki mınýt ótken soń alań qojaıyndary qaýipti shabýyldyń qarymtasyn qaıtaryp qana qomaı, gol soǵýǵa múmkindik aldy. Kezdesýdiń 10-mınýtynda alań ortasynan shabýyl uıymdastyrǵan Neboısha Kosovıch aıyp alańynda turǵan Artýr Shýshenachevke dál pas berdi. Uzyn boıly shabýylshy dopty keýdesimen tosyp, Vagner Lavqa gol soǵatyn tamasha múmkindik jasap berdi. 37 jastaǵy tájirıbeli shabýylshy óz múmkindigin múlt jibermedi. Esep – 1:0. Birinshi taımnyń sońyna taman Vagnerde esepti eseleı túsetin taǵy bir ońtaıly sát bolǵan. Biraq brazılııalyq fýtbolshynyń soqqysyn «Makkabı» qaqpashysy Djosh Koen qaıtara bildi.
Ekinshi taımdy eki klýbtyń oıynshylary da belsendi bastady. «Makkabı» úshin erterek esepti teńestirip alý mańyzdy bolsa, «Qaıratqa» taǵy bir gol soǵyp, kelesi kezeńniń máselesin merziminen buryn sheshý mańyzdy edi. 65-mınýtta qonaqtar sapynan Godsveı Donoh tarazy basyn teńestiretin múmkindigin paıdalana almady. Stas Pokatılov tamasha seıv jasap, qaqpasyn goldan aman saqtap qaldy. Arada bir mınýt ótkende qarsy shabýylǵa shyqqan «Qaırat» aqyry óz degenine jetti. Vagner Lavtyń pasyn qarsylas komandanyń qorǵaýshylary qaıtaramyn dep abaısyzda dopty dál Aıbol Ábikenniń aıaǵyna salyp berdi. Aıbol áýedegi dopty jerge túsirmeı teýip, qaqpa torynda týlatty. Match sońyna deıin eki klýbta da gol soǵatyn birneshe múmkindik bolǵan. Alaıda qaqpashylardyń qyraǵylyǵynyń arqasynda tablodaǵy esep ózgerissiz qaldy.
Osylaısha «Qaırat» óz tarıhynda Izraıl komandasyn birinshi ret jeńip, Eýrododa jarysynyń kelesi kezeńine shyqty. Endi almatylyq ujym Chempıondar lıgasynyń ekinshi irikteý kezeńinde Serbııa chempıony «Srvena Zvezda» komandasymen kezdesedi. Alǵashqy oıyn 20 shildede Almatyda ótse, jaýapty kezdesý 27 shilde kúni Belgradta oınalady. «Qaırat» buǵan deıin Eýropa lıgasynyń irikteý kezeńinde serbııalyq komandamen 4 ret kezdesip, onyń úsheýinde jeńiske jetken. Sońǵy ret eki klýb jasyl alańda 2015 jyly jolyqqan. Syrt alańdaǵy birinshi oıynda «Qaırat» 2:0, Almatydaǵy básekede 2:1 esebimen basym túsken.
«Qaırat» birinshi aınalymdaǵy jeńisiniń arqasynda 331 000 AQSh dollary kóleminde tabys tapty. Al ekinshi kezeńge ótkeni úshin almatylyq klýb taǵy 450 000 dollar qarjy alady.
Aıta keteıik, Konferensııa lıgasynda óner kórsetetin Qazaqstannyń úsh klýby jarystaryn 22 shildede bastaıdy. Alǵash elordanyń «Astanasy» Grekııanyń «Arısimen» kezdesse, keıinnen Qaraǵandynyń «Shahteri» Rýmynııanyń «Stıaýasymen» oınaıdy. Al Qazaqstan birinshiliginiń kúmis júldegeri «Tobyl» horvatııalyq «Haıdýk» klýbymen baq synaıdy.
Konferensııa lıgasynyń erejesi boıynsha, eki oıyn qorytyndysy boıynsha jeńilgen komanda jarysty sol jerden aıaqtap, Eýrokýbok jarystarynan shyǵyp qalady.
