Olar ózderiniń buryn jylqy urlaǵanyn moıyndaǵan. Oǵan qosa, taǵy úsh qoı urlaǵan. Urlyqqa dánikkender Qyzyljar aýdanynyń 34 jastaǵy jáne Petropavl qalasynyń 43 jastaǵy turǵyny bolyp shyqty. Ekeýi de buryn osyndaı qylmystar jasap, sottalǵan.
Sońǵy ret qaraqshylar Jambyl aýdanynda eki qoı urlaǵan. Endi ekeýi de birneshe ret jasaǵan qylmystary úshin mal ıesimen kelisimge kelse de merzimdi jazalaryn temir tordyń ar jaǵynda óteıdi. Qazir olardyń ústinen sotqa deıingi tergeý júrgizilýde.
«Kúdiktilerdiń aıtýynsha, olar jalǵa alǵan kólikpen qozǵala otyryp, erkin jaıylymda júrgen janýarlardy nemese baqtashynyń qaraýynsyz qalǵan maldardy ańdyǵan. Urlanǵan maldardy ózderiniń bireýiniń jer úıiniń aýlasynda múshelep soıǵan. Qazirgi ýaqytta kúdiktiler tergeý oqshaýlaǵyshynda qamaýda otyr», dedi aýdandyq polısııa bólimi bastyǵynyń mindetin atqarýshy polısııa kapıtany Isa Mustafın.
Jalpy, jyl basynan beri oblysta 18 mal urlaý faktisi tirkelip, búgingi tańda onyń 16-sy ashylǵan. Sonyń ishinde bir otar qoı joǵalyp ketken. Dál osy Mamlıýt aýdanynyń bir turǵyny jýyrda óziniń 53 qoıy men 5 eshkisi joǵalǵanyn aıtyp polısııaǵa shaǵymdanǵan. Ol qoılaryn aýyldan 3 km jerge ádettegideı jaıylymǵa jibergen. 2-3 saǵattan keıin qarap qoımaq bolyp kelse, maly ushty-kúıli joq bolǵan. Bul aýyl Reseı Federasııasymen shektesedi. Malyn bireý shekaradan aıdap áketti me dep janushyrǵan mal ıesi polısııaǵa júginedi. Polısııa jedel is-shara jasap, tórt toppen jan-jaqtan joǵalǵan maldy izdeýge kirisedi. 5 qyzmetkerden turatyn taǵy bir top jaqyn mańdaǵy aýyldarǵa baryp, úı-úıdi aralaǵan, jergilikti turǵyndar men baqtashylardan surastyrǵan. Ýchaskelik ınspektorlar WhatsApp messendjeri arqyly baǵdarlardy fermerlik jáne sharýa qojalyqtarynyń jumyskerlerine taratqan.
Kelesi kúni izdeý jumysymen 5 top aınalysyp, polıseıler birlesken izdeý júrgizý úshin shekarashylarǵa da júgingen. Qatty jaýǵan nóser tehnıkanyń júrýine kedergi keltiredi. Orman, dala, kól jaǵalaryn rezeńke etikpen jaıaý aralaýǵa týra kelgen.
Osyndaı jiti izdestirýdiń arqasynda 40 qoı tek 14 shilde kúni qalyń ormannyń ishinen tabylady. Keıin batpaq mańynan bólinip qalǵan janýarlar da tabyldy. Maly tabylǵan ıesiniń qýanyshynda shek joq. Alaıda oǵan malyn baqtashyǵa bermeı, ıesiz qaldyrǵany úshin ákimshilik jaza qoldanylady.
«Jyl basynan beri aýdanda osymen besinshi ret mal joǵalyp otyr. Biz mal ıelerin jaıý erejelerin qatań saqtaýǵa shaqyrǵanymyzben, ony oryndaǵysy kelmeıtinder kóp. Erkin jaıylym mal urylaryna jáne janýarlardyń óz betimen qańǵyp ketýine jaǵdaı jasaıdy. Qańǵyp júrgen mal jol qozǵalysy qatysýshylaryna da qaýip tóndiretinin umytpaǵan jón», dedi kapıtan I.Mustafın.
«Baqpasań, mal ketedi» degen osy, ıeleri maldaryn baqtashyǵa tapsyrmasa, osyndaı mashaqattyń aıaq astynan shyǵa bereri anyq.
Soltústik Qazaqstan oblysy,
Mamlıýt aýdany
