IIM-niń qyzmetkerleri qan men onyń komponentterin qaýipsiz tapsyrý úshin barlyq jaǵdaı jasalǵan qan ortalyǵynyń mamandandyrylǵan avtobýsynda kezekti ret qan tapsyrdy. Donorlyq aksııaǵa IIM ortalyq apparatynyń 60-qa jýyq qyzmetkeri qatysyp, qan ortalyǵyna 26 lıtr qan jiberildi.
Qan hırýrgııalyq operasııalar jasaý jáne kúıikke shaldyqqan naýqastarǵa kómek kórsetý kezinde qajet. Ol onkologııalyq naýqastardyń ómirin saqtaýǵa jáne basqa da aýrýlardy emdeýde úlken ról atqarady. Donorlyq qan qorlaryn turaqty túrde tolyqtyrý – adamdardyń ómiri men densaýlyǵyn saqtaýdyń kepili. Sondyqtan mınıstrlik qyzmetkerleri donorlyq aksııalarǵa qatysýdy dástúrge aınaldyrǵan.
«Men úshin qan tapsyrý óte mańyzdy. Sebebi biz tapsyratyn qan 450 mıllılıtr bolsa da, ol bireýdiń ómirin saqtap qalýy múmkin», deıdi Esirtki qylmysyna qarsy is-qımyl departamentiniń qyzmetkeri Rıza Tóleýbaı.
QR DSM Transfýzıologııa ǵylymı-óndiristik ortalyǵynyń medısına qyzmetkerleri Ishki ister mınıstrliginiń donorlaryna alǵys bildirdi.
