Otyrysqa jumys tobynyń músheleri, múddeli memlekettik organdar men uıymdardyń ókilderi jáne Birikken Ulttar Uıymy Damý baǵdarlamasynyń (BUUDB) Qazaqstandaǵy ókili qatysty.
Pandemııaǵa baılanysty Qazaqstannyń BUU Násildik kemsitýshilikti joıý jónindegi komıtetinde baıandama jasaý merzimi ózgertilip, 2022 jyly Jenevada ótkizý josparlanǵan bolatyn.
Jumys tobynyń jetekshisi – Aqparat jáne qoǵamdyq damý vıse-mınıstri Serik Egizbaev jıynǵa qatysýshylardy BUU Násildik kemsitýshilikti joıý jónindegi komıtetiniń baıandama mazmunyna qatysty kommentarıılerin qaıta talqylaýǵa shaqyrdy.
«BUU Komıteti usynymdarynyń basym bóligin Qazaqstan oryndady. Sonymen qatar muqııat zertteýdi qajet etetin birneshe usynys bar. Mysaly, dıskrımınasııaǵa qarsy jeke zańnamany ázirleý. Bul másele túrli eldiń tájirıbesi arqyly odan ári birlesken zertteýdi talap etedi», dedi Serik Egizbaev.
Sonymen qatar BUUDB-nyń Qazaqstandaǵy ulttyq sarapshysy BUU Komıtetiniń qorytyndy eskertýlerin joıý boıynsha múddeli memlekettik organdarmen jáne uıymdarmen júrgizilip jatqan jumystar týraly aıtyp berdi.
Esterińizge sala keteıik, 1998 jyly Qazaqstan Násildik kemsitýshiliktiń barlyq nysanyn joıý týraly Halyqaralyq konvensııany ratıfıkasııalaǵan bolatyn. Konvensııa normalaryn oryndaý sheńberinde Úkimet qaýlysymen «Násildik kemsitýshiliktiń barlyq nysanyn joıý týraly halyqaralyq konvensııany Qazaqstan Respýblıkasynyń oryndaýy týraly segizinshi-onynshy jıyntyq merzimdi baıandamasy» bekitilgen.
Baıandamany Aqparat jáne qoǵamdyq damý mınıstrligi janyndaǵy Vedomstvoaralyq jumys toby barlyq múddeli memlekettik organnyń qatysýymen ázirlep, onda 2014-2017 jyldar aralyǵyndaǵy eseptik kezeńde Qazaqstannyń Konvensııa baptaryn iske asyrýy jónindegi aqparat qamtylǵan.
Daıyndaǵan
Káribaı MUSYRMAN,
«Egemen Qazaqstan»
