Aýdandaǵy eń úlken eldi meken – Podstepnoı aýyldyq okrýgi aýmaǵynda 10 370 adam turady. 6 712 saılaýshy okrýg aýmaǵyndaǵy 5 saılaý ýchaskesinde daýys berdi. Biz aýyldyq mádenıet úıinde ornalasqan №384 saılaý ýchaskesine tańerteńgi 10.00. saǵat shamasynda bardyq. Mádenıet úıi aldynda uıymdastyrylǵan aýyl sharýashylyǵy jármeńkesi, alystan estiletin qazaqy áýender búgingi is-sharaǵa merekelik sıpat berip turdy.
«2 197 saılaýshy bar tizimde, qazirgi ýaqytta birinshi ret bolyp jatqan saılaý ǵoı, kelip jatqan kisilerdiń kóńil-kúıi jaqsy. Úlken kisiler meıram sııaqty kelip, bizdi quttyqtap jatyr. Kenttiń ózinde 3 saılaý bólimshesi bar. Halyqqa rızamyz, karantındik talaptardy túsinip, saqtyq sharalaryn saqtaǵan. Bizdiń saılaý ýchaskesi boıynsha eki saǵattyń ishinde tirkelgen saılaýshylardyń 12 paıyzy daýys berdi», deıdi №384 ýchaskelik saılaý komıssııasynyń tóraǵasy Gúlaıym Saǵyndyqqyzy.
Biz kólik tiregen kelesi meken – Aqsýat aýyly boldy. Okrýgte jalpy sany 2 967 adam turady. Okrýg quramyna ortalyqtan bólek, Magıstralnoe, Poıma, Áıtıev sekildi shaǵyn aýyldar kiredi. Oblys ortalyǵyna jaqyn, topyraǵy qunarly, sýly-nýly jerde ornalasqandyqtan, halyqtyń ál-aýqaty jaqsy ekeni sezilip tur. Okrýgte eńbekke jaramdy 1 355 adamnyń 1 277-si jumyspen qamtylǵan. Okrýg aýmaǵynda ónimi kórshiles shetelderge de shyǵarylatyn ataqty kúnbaǵys maıy zaýyty jumys istep tur. Aýylda 5 zańdy tulǵa, 12 jeke kásipker, 11 sharýa qojalyǵy bar eken.
«Aýylda tirkelgen 734 saılaýshymyz bar. Qazirgi jaǵdaıǵa qaraǵanda halyqtyń belsendiligi jaman emes», dedi №352 saılaý ýchaskesiniń tóraǵasy Erjan Qurmanov.
Bir qyzyǵy, Aqsýat aýylynyń tizginin ustaýǵa nıet bildirgen eki úmitker de buryn bul aýylda turmaǵan, syrttan kelgen azamattar eken. Pandemııanyń órshýine baılanysty saılaýaldy úgit-nasıhat kezeńinde úmitkerler jıyn ótkize almapty. Kóp is-shara áleýmettik jeliler arqyly ótken. Okrýgti aralap, aýyl aqsaqaldarymen, belsendi toptarmen kezdesken keıbir úmitker eldiń esinde qalypty.
«Osy Poıma aýylynda 1996 jyldan beri turamyn. Búgingi saılaý uıymshyldyqpen ótip jatqan sııaqty. Eki kandıdattyń bireýin jaqsy tanımyn. Aýyldy aralap, kelip júrgende áńgimesin tyńdap edim. Qolynan is keletin, laıyqty jigit sııaqty. Daýysymdy soǵan berdim», deıdi 71 jastaǵy Qabı Bektenov.
Baıqaǵanymyz, okrýg aýmaǵynda uıaly baılanys, mobıldi ınternet sapasy jaqsartýdy qajetsinip tur eken. Magıstralnyı men Áıtıev aýyldaryna kireberis joldarǵa jóndeý qajet. Estýimizshe, bul eki aýyldyń kireberis jolyn jóndeýge qajetti 140 mln teńgege bıýdjettik ótinim joldanǵan kórinedi. Poıma aýylyndaǵy bastaýysh mektep ǵımaraty da kózge qorashtaý kórindi. Munyń bárin el tańdaǵan aýyl ákimi aýdan basshylarynyń aldyna qoıyp, máseleni ońynan sheshse kerek.
– Jergilikti ýaqytpen túski saǵat 11.00.-de Batys Qazaqstan oblysy boıynsha saılaýshylardyń 29 paıyzy daýys berdi, – dep habarlady Batys Qazaqstan oblystyq saılaý komıssııasynyń tóraǵasy Ǵaısa Qapaqov.
О́ńirdegi 31 aýyldyq okrýg ákiminiń ornyna barlyǵy 81 kandıdat tirkelgen bolatyn. Sonyń ishinde 39 kandıdatty partııalar usynsa, 42-si – ózin ózi usynǵan azamattar eken.
«Saılaý barysynda 11 adam oıynan aınyp, óz kandıdatýrasyn alyp tastady. Búgin saǵat 7-de saılaý ótýi tıis 79 bólimshe esigi aıqara ashyldy, 488 komıssııa múshesi karantın talaptaryn saqtap, halyqqa óz tańdaýyn jasaýǵa kómek kórsetip jatyr. Saılaý ýchaskelerinde 184 adam baıqaýshy bolyp tirkelgen. Onyń 79-y – kandıdattardyń senimdi ókili bolsa, 62 adam – qoǵamdyq uıymdardan, 43 adam – saıası partııalar tarapynan jiberilgen baıqaýshylar», dedi Ǵaısa Qapaqov.
Kúndizgi saǵat 11-degi málimet boıynsha Aqjaıyq aýdanynda – saılaýshylardyń 16 paıyzy, Bókeıorda aýdanynda – 29 paıyz, Bórlide – 23, Báıterek aýdanynda – 34, Jańaqalada – 33, Qaztalov aýdanynda – 39, Qaratóbede – 34, Syrymda – 41, Terekti aýdanynda – saılaýshylardyń 27 paıyzy daýys bergen. Jalpy oblys boıynsha – 29 paıyz saılaýshy tańdaýyn jasaǵan.
Aıta keteıik, saılaý ýchaskelerindegi qoǵamdyq tártip pen karantındik talaptardyń saqtalýyn qadaǵalap, 130-daı polısııa qyzmetkeri kezekshilik jasady. Batys Qazaqstan oblystyq sanıtarlyq-epıdemıologııalyq baqylaý departamentiniń basshysy Muhamǵalı Aryspaev pen oblystyq Polısııa departamenti jergilikti polısııa qyzmeti basqarmasy bastyǵynyń orynbasary, polısııa podpolkovnıgi Ernar Sultanǵalıevtiń aıtýynsha, saılaý kezinde zańbuzýshylyq oqıǵa tirkelmegen.
Batys Qazaqstan oblysy
